Piştî êrîşên Amerîkayê yên li ser Îranê li herêmê rageşî hîn zêdetir bû. Piştî êrîşên Îranê yên li ser Bahreyn, Qatar, Umman û Urdunê li gelek welatan, hişyarî hate dayîn.
Piştî ku Amerîka li Îranê li gelek hedefan xist, êrîşên Îranê yên ji bo bersivdanê li welatên Kendavê belav bûn. Ji ber êrîşên li ser Bahreyn, Qatar, Umman û Urdunê tedbîrên ewlehiyê hatin zêdekirin.
Li gorî agahiyên ajansa nûçeyan a fermî ONA ya Ummanê, hin nuqteyên li wîlayeta Musandam a li bakurê welêt bûne hedefa balafirên bêmirov.
Rêveberiya Ummanê êrîş şermezar kir û ragihand ku bi armanca mîsogerkirina ewlehiya welêt û welatiyan, hemû tedbîrên pêwîst hatine girtin.
Li Qatarê 3 kes birîndar bûn
Wezareta Karên Hundir a Qatarê ragihand ku ji ber ketina parçeyên fuzeyên Îranê yên ji aliyê sîstema parastina hewayî ve hatine astengkirin, 3 kes birîndar bûn ku yek ji wan zarok bû.
Rayedaran diyar kir ku birîndar birine tedawiyê û yekîneyên ewlehiyê û parastina sivîl prosedurên rewşa lezgîn xistine dewrê.
Li Bahreynê cara sêyan alarm hate dayîn
Wezareta Karên Hundir a Bahreynê ragihand ku di nava rojê de 3 caran sîrenên êrîşa hewayî lêxistine.
Rayedaran bang li gel kir ku bila aram bin û biçin stareyên herî nêz.
Urdun: Ji Îranê 3 fuze hatin avêtin
Artêşa Urdunê ragihand ku 3 fuzeyên ji Îranê hatine avêtin, danê siharê ketine herêmên cuda yên welêt. Li gorî daneyên ewilî, di êrîşan de windahiyên can çênebûne.
Çavkaniyên leşkerî diyar kirin ku wê destûr neyê dayîn ku qada hewayî ya Urdunê û xaka wê bibe qada şerê herêmî û ragihandin ku li dijî her cure gefa li ser desthilatdariya welêt, wê bi rengekî ‘bi biryar’ bersiv were dayîn.
Li Hurmuzê di keştiya êrÎş li ser pêk hatî de, welatiyên Hindistanê jî hebûn
Wezareta Karên Derve ya Hindistanê ragihand ku di keştiya ku li Kendava Hurmuzê êrîş li ser pêk hatî de 11 welatiyên Hindistanê hebûn.
Di daxuyaniyê de hate diyarkirin ku 10 kes hatine rizgarkirin û kesek jî winda ye.
