Dayika Aştiyê Bahar Bîlge ya ku hevjîn, du kurê wê û du neviyê wê di têkoşîna azadiya Kurdistanê de jiyana xwe ji dest dane, wefat kir. Dayika Baharê bi gotina xwe ya, “Ez dayika Serok û Kurdistanê me” di bîra xelkê de maye.
Dayika Aştiyê Bahar Bîlge ya 87 salî koça dawî kir. Ew ji Nisêbîna navçeya Mêrdînê ye. Bi tevî malbata xwe ve ji ber qedexeya derketina derve yên di sala 2015-2016an de neçar ku koçî Qosera navçeya Mêrdînê bike.
Dayika Bahar tevî temenê xwe yê extiyar jî salên dirêj bû di têkoşîna Meclîsa Dayikên Aştiyê de cih digir û li gelek deveran beşdarî çalakiyên bêhejmar bû.
Dayik û pîra cangoriyan
Hevjîna dayika Baharê, Abdulkadîr Bîlge di sala 1994an de li Nis3ebînê ji aliyê hîzbulkontra ve hate kuştin. Kurê wê endamê PKKê Zeynel Abidîn Bîlge (Piling) jî di sala 1996an de li Çelêya navçeya Colemêrgê jiyana xwe ji dest da. Kurê wê yê mezin Ekrem Bîlge (Diyar Bagok) yê endamê YPGê jî di sala 2014an de li Kobanê jiyana xwe ji dest da. Kurek wê din jî Huseyîn Bîlge bû ku 30 sal di girtîgehê de ma û di sala 2021an de hatibû berdan.
Neviyê dayika Baharê, Mazlum Bîlge (Piling Bagok) û Abdulhalîm Demîr (Diyar Bagok) jî di sala 2016an de li Minbicê di şer de jiyana xwe ji dest dan.
‘Ez dayika Kurdistanê me’
Dayika Bahar tevî ku çavê wê nedîtin jî di sala 2014an de bi rojan li ser sînorê Kobanê di çalakiya li gundê Mehsertê yê Pirsûsê de ji bo Kobanê nobetê girtibû û li wir bûbû remza çalakiyê. Bahar Bîlge di sala 2014an de di hevpeyvînek xwe ya li gel Ajansa Nûçeyan a Dîcle (DÎHA) de wiha gotibû, “Hevjînê min û zarokên min ji min girtin û îşkence li wan kirin. Li naverasta sûkê şeytanokan (hizbulkontra) li hevjînê min dan wî kuştin. Paşê jî kurê min ê biçûk Piling şehîd ket. Lawê min Huseyîn jî ku zanîngehê dixwend girtin û cezayê muebedê lê birîn. 23 sal in di girtîgehê de ye. Kurê min ê mezin Diyar Bagok jî li her aliyê Kurditanê şer kir û du sê sal in li Rojava şer dikir. Mehek berê li Kobanê şehîd ket. Ez dayika Serok im. Ez dayika hemû şervana me. Ez dayika Kurdistanê me. 3 sal in çavê min baş nabînin. Lê belê tevî vê yekê jî min xwest ez li ser sînorê Kobanê têkoşîna lawê xwe bidomînim.”
Cenazeyê dayika Bahar dê li Goristana Hecaca ya Nisêbînê were veşartin û şîna wê jî li Mala Şînê ya Abdulkadîr Dundar a Qoserê bê danîn.
