Şirnex – Malbata gerîla Zeynep Oz (Bêrîtan Botan) ku beriya salekê tev li merasîma îmhakirina çekan bûbû diyar kir ku zarokên wan her tişt kir û divê êdî dewlet tişta dikeve ser milê wê bike û got ku heger silhek tê kirin divê Rêberê Gelê Kurd Abdullah Ocalan azad bibe.
Piştî banga Aştiyê û Civaka Demokratîk a Rêberê Gelê Kurd Abdullah Ocalan, Tevgera Azadiyê ji bo pêvajoya Abdullah Ocalan daye destpêkirin pêş bikeve gelek gavên girîng avêtin. Yek ji van gavan jî şewitandina çekan bû. Di 11ê Tîrmeha 2025an de bi tevlibûna Hevseroka Rêveberiya Konseya KCKê Besê Hozat, Endamê Komîteya Navendî ya PKKê Nedîm Seven û 28 gerîlayên PKKê li Şikefta Cesenayê bi navê Koma Aştî û Civaka Demokratîk çekên xwe şewitandin ango îmha kirin.
Bi vê gavê Tevgera Azadiyê girêdana xwe ya bi banga Abdullah Ocalan re bi awayekî şênber nîşan da. Ji wê rojê heya îro salek derbas bû û li ser ewqas gavên şênber ên Tevgera Azadiyê jî lê ji aliyê dewleta Tirkiyeyê ve gaveke şênber nehatiye avêtin.
Dema 11ê Tîrmeha 2025an malbatên gerîlayan dîtin ku zarokên wan ji bo pêşketina pêvajoya Aştî û Civaka Demokratîk gavek ewqas gîring avêtin bi vê yekê kêfxweş bûn û gelek malbatan diyar kirin ku ew ji bo aştiyek bi rûmet li pey biryara Tevgera Azadiyê û zarokên xwe ne.
Yek ji malbatên ku keça wan çeka xwe şewitandiye jî malbata endama Tevgera Azadiyê Zeynep Oz (Bêrîtan Botan) e. Weke gelek malbatan, malbata Zeynep Oz a ku li navçeya Cizîrê dijî piştî salên dirêj cara yekemîn keça xwe dîtibû û bi vê yekê şanaz bûbû. Dayik û bavê Zeynep Oz jî bertek nîşanî gav neavêtina dewletê dan.
‘PKKê her tişt kir niha dora dewletê ye’
Elîf Oz da zanîn ku keça wê ji bo aştiyê çeka xwe şewitandiye û wiha got: “Bi ser gava ku hatiye avêtin re salek derbas bû. Lê heya niha dewleta Tirkiyeyê gavek neavêtiye. Wan gavek avêt lê em tiştekî ji aliyê dewletê ve nabînin. PKKê gavên xwe avêtine û li benda dewletê ye. Divê êdî dewlet tişta dikeve ser milê wê bike.”
‘Zarokên me dixwazin di nav gelê xwe de siyaseta demokratîk bikin’
Elîf Oz diyar kir ku ew dixwazin Rêberê Gelê Kurd Abdullah Ocalan azad bibe û ev yek anî ziman: “Em dixwazin dewlet gav biavêje û zarokên me werin siyaseta demokratîk bikin. Bila deriyê zindanan were vekirin. Madem silh heye bila Serokê me were berdan. Em jî zarokên me jî li bendê ne ku dewlet gavên hiqûqî biavêje.”
‘Divê dewlet dereng nemîne û gav biavêje’
Bavê Zeynebê, Îbrahîm Oz jî da zanîn ku gava beriya salekê hatiye avêtin gavek ber bi aştiyê ve bû û wiha got: “Wan ji bo aştiyê gavek avêt. Me divê dewlet jî bersivekî bide vê gavê. Vaye salek derbas bû lê em tiştek nedît. Ew kesên ku çek şewitandin dixwazin werin nav gelê xwe û siyaseta xwe bikin. Divê dewlet dereng nemîne û gavekî biavêje.”
