Rêxistinê DEM Partî, DBP û TJA’yî ê Rihayî seba vengdayîşê Mîtîngê Azadîye ê 28ê hezîrana 2026 de Amed de bêro viraştiş eşkerayîye da û vat: “Bêrê ma waştişê xo û azadîya fîzîkî ê Birêz Ocalanî bi ca bîyarê.”
Rêxistinê DEM Partî, Partîya Herêmanê Demokratîkan (DBP) û Têgêrayîşê Cinîyanê Azadan (TJA) bi amancê vengdayîşê mîtîngo ke 28ê hezîrana 2026 de bi sloganê “Bi Rayberîya Azad ver bi Azadî Rayîrşinê” Meydanê Îstasyone yê Qezaya Yenîşehîrî de bêro viraştişî qezaya Halfetî ya Riha de eşkerayî da. Parlamenterê DEM Partî ê Rihayî Omer Ocalan, endam û rayberê partîyanê sîyasî û sazgehê sîvîl ê demokratîk û xeylî kesî tewrê eşkerayîye bîyî. Eşkerayîye de panqartê “Bi Rayberîya Azad ver bi komelê demokratîk” ame akerdiş û sloganê “Biciwîyo Serek Apo” ame eştiş.
Kurmancîya eşkerayîye Hemsereka DEM Partî ya Rihayî Ayşe Surucu, tirkîya ci zi rayberê DBP’yî ê Riha Omer Kistakî wende.
‘Vengdayîşê Ocalanî seba aştî hêvîyêko gird aferna’
Ayşe Surucu eşkerayîye de îfade kerd ke seba Rojhelatê Mîyanên ke prosesê şerî ra derbas beno, aştî seba şaran lazimîyêka tewr muhîme û wina vat: “Vengdayîşêk ke birêz Abdullah Ocalanî 27ê sibate de kerdbî hem hetê herême ra û hem zî hetê unîversalî ra veng dayo. No vengdayîş seba çareserîya demokratîk, cuya hempar û demokrtaîkbîyayîşê Tirkîya hêvîyêko gird aferna. Badê nê vengdayîşî şer vindert û ma her wextî ra zêdeyî nêzdî aştî û çareserî bîyî.”
Waştişê bingeyînî
Ayşe Surucu dewamîya eşkerayîya de dîyar kerd ke ganî seba aştîyêka birûmete dewlete gamanê laziman bilez bierza û nê çî vatî: “Ganî qanûnê teberê demokrasîyê bêrê vurîyayîş, peynîyê polîtîkayanê qeyûman ê îradeyê şarî ser o bêrê hewanayene. Heme qedexeyê ziwan û kulturî ser o ganî bêrê wedaritiş û statuya kurdî bêro naskerdiş û girewteyê sîyasî bêrê veradayene”
‘Ma azadîya fîzîkî ê birêz Ocalanî bi ca anê’
Ayşe Surucu bale ante tecrîd, şert û mercanê Rayberê Şarê Kurdî Abdullah Ocalan ser û vat seba aştî û çareserîya demokratîk aver şêro, ganî rayîrê azadîya fîzîkî ê Rayberê Şarê Kurdî Abdullah Ocalan bêro akerdiş, şertê ey bêrê başkerdiş. Ayşe Surucu vengdayîşê tewrbîyayîşê şarî seba Mîtîngê Azadîye kerd û wina qiseyê xo qedêna: “Nê dewrî muhîmî de, ma qezaya Xalfetî ya ke Rayber Abdullah Ocalan maya xo ra bîyo de, veng danê şarê xo. Bêrê ma 28ê hezîrane de, Meydanê Îstasyone yê Amedî de saete 17:00 de bi sloganê “Bi Rayberîya Azad ver bi komelê demokratîk waştişanê xo bîyare ziwan û azadîya fîzîkî ya Birêz Ocalan bi ca bîyarê.
Eşkerayîye bi sloganê “Biciwîyo Serek Apo” qedîya.
