Stenbol – Komîsyonê Hepisxaneyan ê Şubeyê ÎHDyî yê Stenbolî hewteyê 743. de seba ke bal biancê rewşa girewteyê nêweşî Resûl Baltaciyî ser, çalakî viraşte û waşt ke Resûl Baltaci bêro veradayene û derman kerdene.
Komîsyonê Hepisxaneyan ê Şubeyê Komeleya Heqanê Merdiman (ÎHD) ê Stenbolî hewtyê 743. de verê bînaya komeleya xo ya ke qezaya Beyogluyî de ya, çalakîya ‘Roniştişê Fyî’ viraşte. Aktîvîstê heqanê merdiman, keyeyê girewteyan û temsîlkarê rêxistinanê siyasî û sivîlan tewrê çalakî bîyî. Pawitoxê heqanê merdiman çalakîya nê hewteyî de bale ante rewşa girewteyo nêweş Resûl Baltaciyî ser ke Hepisxaneyê Duzce Tîpê Tyî de yeno girewtene. Eşkerayîye de pankartê “Derman kerdene heq o, nêyeno asteng kerdene” û “Wa girewteyo nêweş Resûl Baltaci bêro veradayene” ameyî akerdene û resmê girewteyanê nêweşan ameyî berz kerdene.
Eşkerayîya bi tirkî endama ÎHDyê Stenbolî Meryem Barse wende.
‘Heqê weşîya Resûl Baltacî yeno binpaykerdene’
Meryem Barse va ke ewro rewşa girewteyo nêweş Resûl Baltacî ke Hepisxaneyê Duzce Tîpê Tyî de yeno girewtene pare kenê û vat: “Resûl Baltaci her çiqas cezayê ey qedîyaya zî, 4 serrî yo nêyeno veradayene. Nêweşîya Resûl Baltacî yê sey tansîyonê berzî, diyabet, fitixê paştî û romatîzma estê. Seba nê nêweşîyan Resûl Baltaci dej anceno û bi tena serê xo nêeşkeno rayîr şoro. Resûl Baltaci wexto ke şino nêweşxane rastê muameleyanê bêrûmetan yeno. Lajê Resûl Baltaciyî derheqê babîyê xo de nê agahî dabî: ‘Ma qehirîyenê ke rewşa babîyê mi hepisxane de bêro astêka winayêne ke peyseragêrayîşê aye çin bo. Heqê bîyayîşî ganî her rewşe de bêro pawitene. Ma wazenê ke kesê pisporî rewşa babîyê mi biewnîyê û goreyê aye bi hawayê ke azad bêro derman kerdene. Ganî vengê kesê ke 34 serrî yo hepisxane de yo, bêro eşnawitene. Ma îmtiyaz nêwazenê, ma wazenê ke heqê weşîye bêro caardene. Babîyê mi bi hincetê ke rewşa ey baş nîya, 4 serrî yo nêyeno veradayene.’ Her çiqas rewş giran o, heqê weşîya Resûl Baltaciyî yeno binpaykerdene. Ma wazenê ke Resûl Baltaci bilez bêro veradayene.”
Badê wendişê eşkerayîye çalakî bi sloganan qedîya.
