Dikandar Rifat Dûman o ke perdeyan virazeno û roşeno, tabela û haydarîyê dikanê xo bi ziwanê Kurdkî nuştê. Rifat Dûman o ke behsê muhîmîya ziwanî kerd û da zanayene ke ganî aliqnayîşê tabelaya Kurdkî sey çîyêko ecêb nêro vînayene û vat: “Ganî ziwanê ekonomî û bazirganîye zî bibo ziwanê Kurdkî.”
Demanê peyênan de Wan de daliqnayîşê tabelayanê Kurdkî serê dikanan de aver şono. Dikandarê şarî nameyanê kurdkî nanê dikananê xo ra û bi kurdkî zî nusenê. No çî roj bi roj mîyanê dikandaran de zêde bano. Dikandarê bi nameyê Rifat Dûman o ke perdeyan virazeno û roşeno, tabela û haydarîyê kurdkî dikanê xo de bikar ano. Rifat Dûmanî vengdayîş kerd û dikandaran ra waşt ke herêm de ziwanê bazirganîye bibo ziwanê kurdkî.
‘Ganî nuştişê bi kurdkî çîyê de asayî bo’
Rifat Dûmanî bal ant serê qedîmîya ziwanê kurdkî û va ke ganî kurdî wayîrê ziwanê xo vejîyê. Rifat Dûmanî ard ziwan ke nuştişê tabelayanê kurdkî ganî nêbaldar bo, asayî bo û wina vat: “Ez panc serrî yo nê karî kena. Karê ma serê tekstîlê keyeyan o. Perde, newresîm, balîşna, rîbalîşna, mînder ûsn. ke keyeyan de kar kenê, ma roşenê. Kurdkî ziwanê miletê ke nê erdî de ciwîyenê o. Ma 2 hezar 3 hezar serrî yo ke belkî zêde yo zî, nê erdî de ciwîyenê. Ganî no gamê ma yo ke ma eşto, sey çîyê de balkêşî, sey çîyê de ecêbî nêbo. Ganî nuştişê kurdkî çîyê de asayî bo. Amanc û mesajê ma ya esasî ziwanê ma yo.”
‘Ganî ziwanê ma ekonomî de zî bêro şuxulnayene’
Rifat Dûmanî dîyar kerd ke ganî ziwanê Kurdkî ekonomî de zî bêro kar ardene û no çî ard ziwan: “Meymanêk wexto ke karê xo keno, goreyê muşterîyanê xo têgêreno. Ma nika vînenê ke qiseykerdişê bi kurdkî zaf kêmî yo. Esnafê ma zî hayîdarê ziwanê xo nîyê. Ganî esnaf zî, kesê ke bazirganîye kenê zî ziwanê xo vîr nêkerê. Tesîrê tabela ma serê muşterîyan de zaf esto, şar seba ke heta nika çîyê winayînî kêmî vînayo, zaf pê şa beno. Ganî ma tena warê ekonomî de ney, her warî de wayîrê ziwanê xo vejîyê.”
