YPJ’yî vat yeno waştene ke bi çeteyanê ke kincê xo bedilnayê dewlete bêro ronayene û seba ke wezîfe dîyayo kiştoxê Hevrîne Xelef nêrazîbîyayîş mojna û vat: “Sûrîyeya newîye hetê kiştoxanê cinîyan ra nê, do hetê cinîyan ê azadan ra bêro ronayene”
Fermandarîya Pêroyî ya Yewîyanê Pawitişî yê Cinîyan (YPJ) derheqê prosesê Sûrîye û polîtîkayanê ci yê ke yeno waştene bêrê averberdene de sîteyê xo yo fermî yê înternetî de eşkerayîye daye.
Eşkerayîye de ca dîya nînan:
“Sûrîye de rejîmê Baasî ke qet cewabêkê waştişanê komelkî nêda, rijîya û prosesêko newe yo ke tede xeylê zordarîye ciwîyene, dewam keno.
Nê prosesê tarîxî de ke dinya bi taybetî Rojhelatê Mîyanên zereyê ci ra ravêreno, eke hasasîyetê muzakereyanê wextê dergî yê seba awankerdişê netewe mevejîyê meydan, nê muzakereyî meşrûyetê xo vîndî kenê. Na çarçawe de 29ê çeleyî de Şam de peyê beranê qefilnayeyan de qederê herêmêkê girdî hetê grûbanê çekdaran ra ame bewlîkerdene.
Rayberê çeteyê Ehrer El Şargiye Hatim Ebu Şakra yo ke kiştoxê Sekretera Pêroyî ya Partîya Ameyoxê Sûrîye Hevrîne Xelef o, tewrê nê konferansî bi û wezîfe dîya ci. Na rewşe mojnena ke hukmatê Şamî têkoşînê cinîyan ê kurdan o ke hetê heme dinya ra yeno naskerdene, înkar kena. Dahîna xirabe zî ame mojnayene ke Sûrîyeya newî de ya ke yena înşakerdene cayê cinîyan bitaybetî zî cayê cinîyan ê kurdan çîn o. Her qeraro ke kongre o konferansî bê tewrbîyayîşê şar û cinîyan genê, meşrû nîyê û ma sey YPJ’yî nê qeraran qebul nêkenê.
Sey şervananê azadîye yê QSD-YPG’yî serkêşîya YPJ’yî de ma vera DAÎŞ’î ke AKP paştî dano ci, seba ke şar û merdimîya xo bipawê 14 serrî yo têkoşîn kenê. Xeylê welatanê Ewropa de tewr peynî de Amerîka de hêrişê çeteyanê cîhadîstan ke ameyî kerdene, xeyrê nê têkoşînê ma ameyî vindarnayene û sînordarkerdene.
Zîhnîyeto cîhadîst û temsîlkarê ci cehd kenê ke serê çeteyanê verênan ra înan ke kincê xo bedilnaye, dewlete ronê. Na rewşe semedê ma nîna qebulkerdene. Nê hêzê cîhadîstê ke bi nameyanê neweyan hêrişê şaranê Rojawanî kenê, ewro bi înan yeno waştene ke dewlete bêro ronayene. Beno ke bi kincanê neweyan xo bibedilnayo la destê înan de gonîya bi hezaran kesan est a. Nê kiştoxan qirkerdişî kerdî, sereyê merdiman tira kerdî, bitaybetî bedenê cinîyan kerdî parçe parçe, heta bêehleqîye kerde. Ma nêeşkenê raştîya nê kiştoxan nêvînayîşî ra bêrê. Ganî nê kiştoxî cade teslîmê edaletî bibê û cezaya ke heq kenê bidîyo înan. Serekkomarê tirkî Erdogan zî seba ke nê kerdî weye û şuxulnayî ganî Mehkemeya Cezaya Girane de bêro muhakemekerdene.
Nê erdan de gama ke cinî ameyî qetilkerdene rijnayîşî zî dest pêkerd. Coka Sûrîyeya newîye hetê kiştoxanê cinîyan ra nê, hetê cinîyan ê azadan ra do bêro awankerdene.”
