Sîyasetmedarê kurd Muhsîn Melîk û Mehmet Ayyildiz Goristanê Berê Harranî yê qezaya Eyyubîye ya Rîha de goranê xo ser o ameyî yadkerdiş.
Yadkerdiş hetê KAT-DERî ra ame viraştiş û endamê keyeyî, temsîlkarê rêxistinanê komelê sivîlî û partîyanê sîyasî yê şaristanî tewrê yadkerdişî bîyî.
Programê yadkerdişî bi deqeyêk rêzgirewtişî seba kesanê ke têkoşînê azadîye û demokrasî de cuya xo ra bîyê dest pêkerd. Embaza Muhsîn Melîkî, Senay Melîk yadkerdişî de qisey kerd û wina vat: “Ma bi dejê xo yo ke 32 serrî yo kêm nêbîyo tîya de yê. Embazê min o delal, Muhsîn Melîk ke tena sucê ey pawitişê şarî bi, 2ê hezîrana 1994î de merkezê şaristanê Riha de hetê dişmenanê merdimîye ra bi hawayêko hovane ame qetilkerdene.”
Senay Melîk dîyar kerd ke embazê aye pêro tehdît û taqîbkerdişan zî bi berpirsîyarî û hesasîyeyetê roşnvîrêkî kîşta şarê xo, mexdûr û bindestan de vînderto û her wext seba dewaye têkoşîn dayo. Aye wina dewam kerd: “Hişyarî û cesaretê şarî dişmenê demokrasî tersnayî. Hêzê tarî yê ke nêeşkayî înan bitersnê, waşt no lajo wêrek ê şarê kurdî orte ra wedarnê û ramananê ey çin bikerê. Labelê şehîdî nêmirenê. Ê bi ramamanê xo û bi çîyanê ke seba ameyoxî verdenê, cîwîyenê. Ewro hewn, ramanê hêvîyê Muhsînî her tim ma reyde yê. Bi hezaran Muhsîn Melîkî deştanê Mezopotamya de bi eyn ramanî ciwîyenê.”
Hemserekê DEM Partî yê Rîha Nîhat Demîrbîlekî zî vat ke ê taqîbkerdoxê rayîrê raştîye yê ke înan verdaya yo.
Dimayê yadkerdişê serê gora Muhsîn Melîkî, girse ver bi gora Mehmet Yildizî rayra şi. Tîya de zî sozê dewamkerdişê têkoşînî ameye dayene.
Yadkerdiş bi sloganê ‘Şehîdî namirin’ qedîya.
