Fermandarê HSD yê Pêroyî Mazlûm Ebdî, derheqê vurîyayîşê Surîye û têkilîyanê Şamî de ANHA rê qisey kerd. Ey dîyar kerd ke derheqê yewîya erdê Surîye û çareserîya sîyasî de mabênê înan û îdareyê Şamî de problemêk çin o. Ebdî va: “Ma seba çareserî waştişê xo înan rê vatî û ma paweyê cewabî yê.”
Ebdî bale ant Awbendê Tişrînî ser o û va ke înan seba ke hêzê înan Minbicî ra vejîyê hemananê bînan reyde pêkerdo. La dewleta tirke qeraran binpay kena û hêrişanê xo domnena. Ebdî dîyar kerd ke hetê Rojawayê Firatî de hêrişî çin ê la Vakur û Rojhelatê Surîye de şer dewam keno. HSD do verba îşxalkerdişî xo verbido û nêverdo ke awbend û herême bêro girewtene.
Ebdî derheqê dîyalogê HTŞ’yî de zî melumatî dayî û va ke mabênê înan de şer çin o, koordînasyonêko leşkerî est o û ê wazenê ke Surîye yewîya xo ra nêvejîya û mesele bi dîyalogî çareser bibo. Ebdî têkilîya kurdan û yewîya hêzanê kurdan ser o zî qisey kerd û va ke prosesêko newe dest pê keno û seba ameyoxê kurdan zaf muhîm o ke yew bibê. Ey va, “Kurd na qonaxe de hêzê xo çend bimojnê û bibê yew veng ma do hende biresê amancê xo û destkewteyanê xo bipawê.”
