Hemsereka Daîreyê Têkiliyanê Teberî ya Rayberîya Xosere Îlham Ehmed derheqê pêvînayîşê hukmetê demkî de melumatî dayî û vat: “Badê weçînayîşê temsîlkaranê Rojavayê Kurdîstani, meseleya destûrê binyadî do bêro rojeve û temsîlkarê şarê Kurdî zî do komîteya amadekarî ya destûrî de ca bigirê.”
Îlham Ehmed derheqê teedyîyanê kombîyayîşê 15ê nîsane yê Şamî û xebatanê entegrasyonî de ajansê ANHA re qisey kerd. Ehmed diyar kerd ke semedê wedaritişê astengîyan, pêvînayîşê mabênê Rayberîya Xosere û Şamî de dewam kenê.
Babete sereke: Perwerdeyê bi Kurdkî
Ehmed vat ke meseleyanê tewr muhîme ra yew zî sîstemê perwerdeyî bi. Aye vîr ard ke rixmê peymana 29ê çeleyî zî, meseleya dîplomayanê wendekaran hîna nêameya çareserkerdene û wina domna:
“Ma pê kerd ke wextêko nêzdî de herdi wezîrê perwerdeyî û wezîrê wendişê berze semedê nê sîstemî do bêrê Hesekê. Derheqê ziwanê perwerdeyî û sîstemî de zî do pêvînayîşî bêrê kerdene.”
‘Entegrasyon hêdî şino’
Îlham Ehmed dîyar kerd ke çarçewaya entegrasyonî de tayê gamî ameyê eştiş labelê proses giran şino. Aye vat ke hetê sîstemê îdarî de heta nika tena warê weşî û perwerdeyî de mudurîyetê şaristanan ameyê dîyarkerdene, mudurîyetê bînî zî do leze bêrê tespîtkerdene.
Berê sînorî: Eynî karmendî do eyn karî bikerê
Derheqê sîstemê berê sînoran de zî Îlham Ehmed vat ke mekanîzmaya îdarekerdişê sînorê Sêmalka û beranê bînan ameya awankerdene. Karmendê ke verê nêzdîyê Rayberîya Xosere bîyê, nika çarçewaya entegrasyonî de karê xo domnenê.
Tay berpirsîyarê hukmetî benê sebebê nakokîyan
Îlham Ehmed bal ant probleman ser o ke ke wextê caardişê mekanîzma de vejîyayê û vat: “Tayê berpirsîyarê mudirîyetanê ke badê rijîyayîşê rejîmê Esadî hetê hukmetî ra seba demêkî ameyê wezîfedarkerdene, benê sebebê nêrazîbîyayîşan. Ganî tecrubeya Rayberîya Xosere bigîrîya verê çiman û temsîlîyetê pêro kesan bêro esasgirewtene.”
Temsîlîyetê cinîyan: Problem dewam keno
Derheqê YPJ’yî de zî Îlham Ehmed va ke îradeyê cinîyan hîna zî problem o: “Rayberîya Xosere de hûmarêka zaf a cinîyan kar kerdêne. Heta nika mudirê perwerde û weşî ameyê dîyarkerdene labelê her di zî camêrd ê. No semed ra ganî beşdarkerdişê cinîyan sey xuxusîyetêko muhîm bêro esasgirewtene.”
‘Fermîkerdişê YPJ’yî rojev de yo’
Îlham Ehmed bal ant statuyê YPJ’yî zî ser o û va: “Her çend heta nika netîceyêk nêvejîyaba orte zî fermîkerdişê YPJ’yî hîna rojev de yo. Na munaqeşa do heta caardişê peymana pêkerdişî dewam bikera.”
Xebatê destûrê binyadî
Derheqê amadekerdişê destûrê binyadî yê neweyî yê Sûrîye de zî Îlham Ehmed vat: “Badê ke temsîlkarê Rojavayê Kurdîstanî yê parlamentoyî dîyar bîyê, meseleya destûrî do bi cidîyet bêra munaqeşakerdene. Kurdî şirîkê esasî yê awankerdişê nê welatî yê û do nuştişê destûrê binyadî de ca bigîrê. Eynê wextî de ma cehd kenê ke pêro heme girewteyî bêrê veradayene.”
