Wekîlê DEM Partî Omer Ocalanî Rayberê Şarê Kurdî Abdullah Ocalanî reyde derheqê pêdîyayîşê peyênî de qisey kerd. Ocalanî Omer Ocalanî ra vat: “Ziwan, çand û estbîyayîşê kurdan ser o polîtîkayê asîmîlasyonî est ê. La wexto ke hêzê şima yo sîyasî nêbo û şuurê şima bin bikewo, ziwan zî zeîf beno.”
Omer Ocalanî 26ê sibate Girawa Îmralîyî de Rayberê Şarê Kurdî Abdullah Ocalanî reyde ame têhet. Pêdîyayîşî de birayê Rayberê Şarê Kurdî Abdullah Ocalanî Mehmet Ocalan zî est bî. Rayberê Şarê Kurdî Abdullah Ocalanî Abdullah Ocalan ke demêko derg o Girawa Îmralîyî de tecrîd de yeno tepîştene, bi destpêkerdişê prosesê Haştî û Komelê Demokratîkî reyde reya 6. keyeyê xo reyde pêdîyayîş viraşt.
Omer Ocalanî persanê Ajansa Welatî rê cewab da.
Rewşa weşîye û merheba
Omer Ocalanî vat ke rewşa weşîye û hirsê Serok Apoyî zaf baş bî û saete û 40 deqayî ma pêdîyayîş kerd. Vat ke hevalanê xo yê ucayî reyde xebata prosesî dewam keno û şert û mêrcî sey verê bî.
Cîyayîya nê pêdîyayîşî
Omer Ocalanî vat ke nê pêdîyayîşî de Serok Apo hetê fîzîkî ra hîna xurt bî û xebatêka zafhetîye uca de yena kerdene: “Tena seba Vakurê Kurdîstanî ney, seba çar hetanê Kurdîstanî, seba Tirkîye û seba Rojhelatê Mîyanênî xebatî yenê kerdene. Xebatê stratejîkî yê.”
Serdemo newe û sîyaset
Omer Ocalanî vat ke Serok Apoyî tewr zaf serdemo newe erjnayo û vat: “Sîyaset do senî aver şêro? Têkilîya kurdan a tirk û dewlete reyde do senî bibo? Serok Apoyî vat ke teorî xurt a la nika hewceyîye bi gamanê şênberan û pratîkan est a. Konferans, kongre û kombîyayîşanê şarî kenê la ganî sazgehanê xo senî awan bikerê? Ganî pratîk hetê sîyasetî ra hîna bêro xurtkerdene.”
Omer Ocalanî vat ke Serok Apoyî seba dewlete zî vato ke heta nika çekî est bîyî la nika cayê çekan de sîyasetê demokratîk û huqûqî est o û ganî sazgehê demokratîkî bêrê awankerdene. Serok Apoyî vat: “Ziwan, çand û estbîyayîşê kurdan ser o polîtîkayê asîmîlasyonî est ê. La wexto ke hêzê şima yo sîyasî nêbo û şuurê şima bin bikewo, ziwan zî zeîf beno.”
Serok Apoyî qala tatbîqatê qeyûman zî kerd û bi taybetî Şaredarîya Mardînî ard ziwan û vat ke qeyûmî ganî şêrê û hemşaredarî ganî agêrê karê xo ser.
Rojhelatê Kurdîstanî û Îran
Omer Ocalanî vat ke pêdîyayîşî de rewşa Îranî û Rojhelatê Kurdîstanî pare kerd la Serok Apoyî tewr zaf nê babetan ser o nêvindert. La pêdîyayîşê yewinî yê 23ê teşrîna verêne 2024î de Serok Apoyî hîna zaf na babete ser o qisey kerdbî û vat ke dewletê Rojhelatê Mîyanênî yan xo bivurnê ya zî mudaxelayî yenê kerdene.
Çalakîyê Rojawanî û yewîye
Omer Ocalanî vat ke Serok Apoyî hêrişanê Şêxmeqsûd û Eşrefîye ra dima çalakî û ruhê yewîye ke ameyî eşkerabîyene, erjnayî û selamê xo seba heme şaranê ke seba Rojawanî sere wedarnayî erşawitî. Serok Apoyî vat ke berî do seba şarê ma yê ke Ewropa de ciwîyenê do bêrê akerdene.
Azadîya fîzîkîye
Omer Ocalanî vat ke Serok Apoyî statuyê xo ard ziwan û vat: “Statuyê mi eynî wext de statuyê kurdan o.” Serok Apoyî vat ke seba ke rolê xo hîna baş bîyaro caardene ganî şert û mêrcê ci bivuryê û dewam kerd: “Ganî bieşka rojnameger, akademîsyen û kesanê bînan reyde pêdîyayîş bikera.” Omer Ocalanî vat ke heta nika proses giran aver şîyo la Serok Apoyî vat: “Her çiqas proses giran dewam biekro zî ma naye ser o xebitîyenê.”
