Amed – Hevserokê Şaxa Odeya Avahîsazan a Amedê Şerefxan Aydin, bal kişand ser xebatên veguherandina Zindana Amedê ya ji bo muzexaneyê û diyar kir ku di bin navê nûjeniyê de bîra civakî û şopên zilm û berxwedana dîrokî hatine jêbirin û avahî wekî ‘oteleke pênc stêrk’ hatiye dîzaynkirin.
Xebatên veguherandina Zindana Amedê ya ku bi navê Hejmara 5emîn ya ku di salên 1980yî de bi îşkenceyên giran û berxwedana dîrokî tê zanîn, ber bi dawiyê ve diçin. Projeya veguhestinê ya ku di meha Hezîrana 2023yan de ketiye meriyetê şopên zilma dewleta Tirk û berxwedêrên endamên Tevgera Azadiya Kurdistanê roj bi roj tên windakirin.
Hevserokê Şaxa Odeya Avahîsazan a Amedê Şerefxan Aydin têkildarî projeya nûkirin û muzekirina girtîgehê, ji ajansa me re axivî.
‘Avahiyeke wekî oteleke pênc stêrk çêkirine’
Şerefxan Aydin di destpêka axaftina xwe de da zanîn ku wan ji bo parastina rastiya girtîgehê bi hemû saziyên sivîl ên Amedê re di nava koordînasyonê de tevgeriyane û Koordînasyona Girtîgehê ava kirine û wiha got: “Me ji bo neguhertina girtîgehê gelek çalakî, meş û kampanya pêk anîn. Lê mixabin niha derket holê ku ew hemû bertek û daxwazên me yên ji bo hişyariya civakê, pêk nehatine. Bîreke nû û modern ava kirine. Wekî ku em ji dîmenên dawî dibînin, wan hemû rastiyên ku qewimîne guhertine. Avahiyeke gelekî modern, avahiyeke wekî oteleke pênc stêrk çêkirine.”
‘Rastiya ku bi dehan salan hatibû parastin ji holê rakirin’
Di berdewamiya axaftina xwe de Şerefxan Aydin destnîşan kir ku Zindana Amedê cihekî wisa ye ku mafên mirovahiyê lê hatine binpêkirin û ev tişt gotin: “Pêwîst bû ev rastî di muzeyê de bihata nîşandan. Tê zanîn ku di demeke nêz de ev muzexane bê vekirin. Dihat payîn ku li vir cihê binpêkirina mafên mirovan bê nîşandan, lê mixabin ev yek pêk nehat. Rastiya ku bi dehan salan hatibû parastin, niha hatiye guhertin. Rastî ji holê hate rakirin.”
‘Divê nifşên nû ji van rastiyan bêagahî nemînin’
Di dawiya axaftina xwe de Şerefxan Aydin bang li rayedaran kir û wiha got: “Di salvegera 14ê Tîrmehê de derketina holê ya vê rastiyê, mijareke xemgîniyê ye û mixabin ev bîra dîrokî nehate parastin. Li gorî zanyariyên me û agahiyên ku me stendine dê di demeke nêz de ev muzexane bê vekirin. Divê em vê berxwedana dîrokî û bîra dîrokî ya ku li vir heye, bi awayên cuda biparêzin, da ku nifşên pêşerojê, nifşên nû karibin van rastiyan bêagahî nemînin.”
