Qeymeqamiya Beyoglu, Kadikoy û Kuçukçekmece û Walitiya Stenbolê di salekê de qedexe li ser qedexeyan îlan kirin. Herî dawî Qeymeqamiya Kuçukçekmeceyê serlêdana NÇMê ya ji bo konsera Koma Amed betal kir.
Di vê pêvajoya ku çareseriya aştî û civaka demokratîk di rojevê de ye û her kes li ser hiqûq, edalet, demokrasî û mafê mirovan niqaş dike de, qedexe li ser qedexeyan tên îlankirin. Herî dawî li Stenolê Qeymeqamiya Kuçukçekmece konser qedexe kir.
Navenda Çanda Mezopotamyayê (NÇM) li Navenda Pêşandanê ya Yahya Kemal Beyatli ya Şaredariya Kuçukçekmeceya Stenbolê dê konsera Koma Amed li dar bixe. NÇMê ji bo konserê serî li Qeymeqamiya Kuçukçekmeceyê da. Qeyemeqamiyê serlêdanê nirxand û biryar da ku konser ne “guncav” e. Qeymeqamiyê bi hinceta “neguncaviyê” destûr neda ku konser were lidarxistin.
Qeymeqamiya Kadikoyê di 8ê Mijdarê de festîvala MUBÎ Fest a Stenbolê bi hinceta filmê destpêkê mijara LGBTİ+ digire dest qedexe kir.
Walîtiyê ji 7ê Îlonê heta 10ê îlonê li 6 navçeyan qedexe îlan kir. Piştî qeyûm tayînî Rêxistina CHPê ya Stenbolê kirin, Walîtiya Stenbolê ji 7ê îlonê heta 10ê Îlonê li navçeyên Beşiktaş, Beyoglu, Eyupsultan, Kagithane, Sariyer û Şişliyê hemû çalakî qedexe kirin.
Di 28ê Hezîranê de Qeymeqamiya Beyoglû, beriya Meşa Rûmetê ku dihat plankirin di çarçoveya çalakiyên meha rûmetê yên LGBTİ+ de pêk bê, hemû çalakî qedexe kir.
Qeymeqamiya Beyoglu, beriya çalakiyên 25ê Mijdarê hemû çalakî û daxuyanî li navçeyê qedexe kir.
Di 1ê Tîrmehê de piştî êrişa li dijî Kovara Lemanê Platforma Piştevaniya Îslamî banga kolanê kir. Piştî vê yekê Qeymeqamiya Beyogu hemû meş, çalakî û daxuyanî li navçeyê qedexe kir.
Lê di heman rojê de endamên Platforma Piştevaniya Îslamî daketin kolanê û tevî qedexeya Qeymeqam çalakî pêk anîn, lê qeymeqam û polîsan mudaxaleyî endamên vê platformê nekir.
Walîtiya Stenbolê ji 19ê Adarê heta 22ê Adarê 4 rojan qedexe îlan kir.
Di 7ê Adarê de; Qeymeqamiya Beyoglu dîsa beriya çalakiyên 8ê Adarê hemû çalakî li navçeya Beyoglu qedexe kir.
