Lîga Mafên Mirovan a Arjantînê nameyek ji Federasyona Mafên Mirovan a Navneteweyî (FIDH) re şand ku encamekî wê ye û jê xwest ku di mijara azadiya Ocalan de israr bike û di pêvajoya aştiyê de bi rola garantoriyê rabe.
Lîga Mafên Mirovan a Arjantînê ku sala 1937an ava bû û li qada mafên mirovan û edaletê xwedî dîrokeke kûr û girîng e, ji Federasyona Mafên Mirovan a Navneteweyî (FIDH) re nameyek şand ku endamê wê ye. Di nameyê de ji FIDHê hate xwestin ku di mijara azadiya fîzîkî ya Rêberê Gelê Kurd Abdullah Ocalan de israr bike û di pêvajoya aştiyê de bi rola garantoriyê rabe.
Naveroka nameyê bi vî rengî ye:
“Dostên hêja,
Em ji we re li ser Rêberê Gelê Kurd Abdullah Ocalan dinivîsînin ku 27 sal in ji aliyê dewleta Tirk ve girtî tê hiştin. Wî piraniya vê demê di hucreya yek kesî de derbas kir. Bi cezayê girtîgehê yê heta bi hetayê yê girankirî ku vegera jê nîne, tê ragirtin û di 77 saliya xwe de ji mafê hêviyê jî bêpar tê hiştin.
Em zanin ku federasyonê ev mijar gelek caran xistiye rojevê, Abdullah Ocalan weke girtiyekî siyasî nas kiriye û daxwaza azadiya wî kiriye. Lê belê em di wê baweriyê de ne ku li gorî mercên siyasî yên hatine guhertin ku îhtimala pêkhatina aştiyê xuya dike, ev yek dikare firsendên kêrhatî ji bo gelê Kurd û gelên din ên li herêmê biafirîne, derfetên berdana Abdullah Ocalan û bi hezaran girtiyên siyasî yên li girtîgehên Tirkiyeyê hene, ev daxwaz niha hîn girîng û jiyanî ye. Rapor hene ku ji bo xweşbîniyê hincetan pêşkêşî me dikin.
Ji ber vê yekê, di halê hazir de em yeqîn dikin ku dewamkirina piştevaniyê û israra li ser daxawza azadiyê pêwîstî ye. Federasyona Mafên Mirovan a Navneteweyî -bi prestîja xwe- dikare tevkariyeke girîng li aştiyeke adîl a li vê herêmê bike, dawiya dawî di muzakereyan de dikare bi rola garantoriyê rabe.
Lîga Mafên Mirovan a Arjantînê di herikîna dîrokê de dilsoziya xwe ya bi girtiyên siyasî û gel re ispat kiriye; ji ber karên xwe yên parastina mafên mirovan gelek şehîd daye. Dîktatoriya Spanyayê, Şerê Vîetnamê, Şoreşa Kubayê, darizandinên têkildarî dîktatoriya li Arjantînê, qirkirina Fîlîstînê û têkoşîna xweseriyê ya li Sahra Rojava jî di nav de di gelek dozan de bi roleke çalak rabûye. Demeke dirêj e piştgiriyê dide gelê Kurd. Nora Podesta, Nector Trajtemberg û Alexandro Avots bi navê Lîgê silavên xwe ji gelê Kurd re dişînin û dilsoziya xwe ya bi azadiya Rêber Apo û çareseriya pirsgirêka Kurd dubare dikin.”
