Fermandara Karargahê Merkezî yê YJA Starî Zozan Çewlîg îfade kerd ke têkoşînê azadîye yê cinîyanê kurdan bêpawitişî nêbeno û vat: “Cinîyî nika qirkerdişî reyde rî bi rî yê. Vera nê çew nêeşkeno verê têkoşînê cinîyan de vindero.”
Kongreya PKK ya 12. mabênê tarîxanê 5-7ê gulane de Herêmanê Pawitişî yê Medya de ameye kerdene. Encamname û qerarî ke kongre de ameyî girewtene 12ê gulane de raya pêroyî reyde ameyî parekerdene.
Delegeyan ra Fermandara Karargahê Merkezî yê YJA Starî Zozan Çewlîg kongre de wina erjnayîşî kerdî:
“Ma sey cinîyê kurdî û Têgêrayîşê Cinîyan şansê ma est o. Rayber Apoyî tena semedê meseleya kurdan nê semedê meseleyanê ke 5 hezar serran ra zafêr o dewam kenê, têkoşîn kerd. Rayber Apo cinî wina pênas keno: Cinî cuye afirna, serkêşîya komelî kerd, nan dî la ewro bênan a. Ewro bi sîyaset, şer û serdestîya camêrdan heme wareyê cuye cinîyan rê ameyî qerfnayene. Rayber Apoyî şexsê cinîya kurde de estbîyayîşêk, nasnameyêk û zanîstîyêk vet werte.
Ma sey şarê kurdî û cinîyê kurdî îdeolojîya Rayber Apoyî sey nasnameyê xo û azadîya xo vînenê. Ma sey têgêrayîşê cinîyan zelal ê. Ma sey hêzanê pawitişê cinîyan zelal ê. Xelisîyayîşê ma bi xelisîyayîşê Rayber Apoyî mumkin o. Pawitişê xeta Rayber Apoyî pawitişê xeta xelisnayîşê cinîyan o. Ma pêro zanê, têkoşînê azadîye yê cinîyan garantîya serkewtişê xeta Rayber Apoyî ya. Garantîya komelê demokratkî ya. Garantîya pawitişê şarê kurdkî û komelê kurdî ya, garantîya xo pawitişî ya.
Rayber Apoyî cinîye hetê hişmendî, rêxistine û azadîye ra aver berd. Eke cinîyêke şexsê xo de hişmendîya cinîye înşa bikero, her kesî ra zafêr wayîrê nê têkoşînî vejîyena. Ez sey temsîlkarêka hêzanê pawitişî yê cinîyan eşkena nê vajî ke merkezê têkoşînê ma Rayber Apo yo. Na babete de qet şik û teredutê ma çîn o. Ma hêzê xo Rayber Apoyî ra genê. Cinîyî nika qirkerdişî reyde rî bi rî yê. Seba ney çew nêeşkeno verê têkoşînê cinîyan de vindero. Çunke hişmendîya azadîye ya cinîyan cayê xo girewto û cinîye zaf hole zana ke azadîye bêpawitişî nêbena.”
