Wendekarê Unîversîteya Munzurî ameyê pêser û pîya roşanê Gaxanî pîroz kerd. Nînan ra yew zî Nusret Karûn o ke Unîversîteya Munzurî de beşê ziwanê kirmanckî û edebîyatî waneno. Bi kar û xebatanê xo wazeno ke şarê ma ziwanê xo rê wayîr vejîyo.
Nusret Karûn, weşîya xo Dêrsim de ramneno. Ey terba embazanê xo ziwanê kirmanckî/zazakî û kulturî ser o komele awan kerda û ê wazenê ke, şarê Dêrsimî ziwan û kulturê xo rê wayîr vejîyo. Nusret Karûnî ajansê ma rê ziwan û kulturî ser o qisey kerd.
Nê rojî rojê roşanê Gaxanî yê. Nusret Karûnî û hevalanê ey pîya Unîversîteya Munzûrî de şayîya Gaxane viraşta. Seba şayî û karê xo yê serê ziwanê ma rê wina qisey kerd: “Ma ewro seveta Gaxane ju şayî kerde. Ma waşt Gaxane unîversîte de virazîme ke no kulturê ma vîndî nêbo. Kesê ke îta de wanenê wa pê bizanê. Zonê ma, kulturê ma giran giran vîndî beno. Ma serva naye zî no kar o nîyanên kerd. Êyê ke îta de wanenê, zonê xo ra, kulturê xo ra wayîr vejîyê. Domanê ma nê zonî qisey bikerê û binusê.”
‘Zonê ma bîndestîye de ro’
Nusret Karûnî, giseykerdişe xo de qalê bargiranîya ziwanê kirmancî zî kerd û wina va: “Domananê xo de nê zonî qisey bikerê û bidê nuştene ke zonê ma aver şoro. No zon bi domanan reseno meştê. Ez amo ke zonê xo ser bi wendîşê xo bikerî. Zonê ma bîndestîye de ro. Ma perûne pîya rê berxûdarîye wazenîme. Ma serre bi serre benîme jêde. Ma zereyê Dêrsimî de, kirmanckî û kirdaşkî ser, tomîr ser komele kerde ra. Wazenîme ke, zonê ma, lawûkê ma, kulturê ma vîndî nêbo û bêro misnayene.”
‘Zon ke bî vîndî ma kî benîme vîndî’
Nusret Karûnî, peynîya giseykerdişê xo wina arde: “Zon ke bî vîndî, merdim kî beno vîndî, kultur kî bî vîndî, fikr kî beno vîndî, fikir ke merdimî ra şî, merdim her çî xo vîrîra keno. Sarê ma ra vame ke, pîya bi gurîyîme, pîya zon û kulturê xo ra wayîr vejîme. Ewe sarî zon ravêr sono. Zonê xo ra, kulturê xo ra, îtîqatê xo ra wayîr vejîyê. Berê zonî ser bîwanime, ravêr şerîme.”
