RİHA – Detayê pêvînayîşê ke mabenê Heyetê Rojava û Hukmatê Sûrîye yo demkî de bîyê, vejîyê meydan. Badê ke Mezlûm Ebdî eşkera kerd ke estbîyayîşê leşkerî yê HSD’yî qedîyayo, vejîya meydan Mazlûm Ebdî do bibo musteşarê Serekkomarê Sûrîya û Îlham Ehmed zî do biba parlamenterê Sûrîya. Sewbîna ame dîyar kerdene ke kurdkî bîyo ziwano diyîn ê fermî.
Heyetê Rojava yê Kurdîstanî û heyetê Hukmatê Sûrîye yo demkî 25ê tebaxe de kom bîyî û sînor û madeyanê Peymana 29ê çele ser o muneqeşe û qisey kerdê.
Peynîya kombîyayîşî de Fermandarê Pêroyî yê Hêzanê Sûrîyeya Demokratîke (HSD) Mazlûm Ebdî, Koşkê Şarî yê Sûrîye de eşkera kerd ke HSD’yî xo fesîx kerdo û prosesê entegrasyonî ser o xebatanê xo domnenê.
Detayê pêvînayîşî ke di rojî verê cû, paytextê Sûrîye, Şam de, mabenê Fermandarê Pêroyî yê HSD’yî Mezlûm Ebdî û Hemserekê Daîreyê Têkîlîyanê Teberî yê Rayberîya Xoser Îlham Ehmed û Serekkomarê demkî yê Sûrîya de virazîyabî, hêdî hêdî yenê vejîyenê meydan.
Badê pêvînayîşî, Mazlûm Ebdî eşkerayîyeke da û dîyar kerd ke înan estbîyayîşê leşkerî yê HSD’yî qedênaya. Badê na eşkerayîye, çapemenîye de, derheqê wezîfeyê Mazlûm Ebdî û Îlham Ehmed yê hukmatê merkezî de, perwerdeyê bi ziwanê dayîke û rewşa YPJ’yî de agahîyê muhîmî ca girewtê.
Ebdî beno musteşar, Ehmed bena parlamenter
Goreyê çimeyanê herême ke ajansa ma rê ameyê dayene; ame tesdîqkerdene ke Mazlûm Ebdî do sey musteşarê Serekkomarîya Sûrîye bêro tayînkerdene. Sewbîna Îlham Ehmede zî do kotaya Serekkomarîye ra biba Parlamentera Meclîsê Sûrîye û di xebatanê dîplomasîye de bi wezîfe û berpirsîyarîye bixebitîya.
Kurdkî beno ziwano diyîn ê fermî
Çarçewaya peymane de ziwanê kurdkî, pêroyê Sûrîye de sey ziwano diyîn o fermî ame qebulkerdene. Herêmanê kurdan de perwerdeya bi ziwanê dayîke do bêro rêxistinkerdene. Na çarçewaye de do komîsyonêko taybet bêro awakerdene û no komîsyon materyalê perwerdeyî yê kurdkî amade bikero û sîstemê perwerdeyî virazo.
Do derheqê YPJ’yî de eşkerayîye bêro dayene
Babeta bîne ya muhîme ya pêvînayîşî, rewşa leşkerî ya YPJ’yî bî. Ame zanayene ke babeta estbîyayîş û ameyoxê YPJ’’yî de zî pêkerdiş virazîyaya. Yeno pawitene ke saetanê ameyoxî de, keyepelê fermî yê YPJ’’yî de, derheqê babete de eşkerayîyêka şumûldare seba rayapêroyî bêro vilakerdene
