Rayberê ZIMAN-KURD’î ke qezaya Sêwregi ya Riha de ame akerdene, Mazlum Dogan Taniş derheqê amancê awankerdişê komele û xebatane ci de qisey kerd û wina vat: “Amancê ma cigêrayîş û averberdişê kultur, huner û ziwanê Kurdkî yo.”
Komela Cigêrayîş û Averberdişê Kultur û Ziwanê Kurdkî ya Sêwregi (ZIMAN-KURD) aşmêk ra ver qezaya Sêwregi ya Riha de bi hewayêko fermî ameye akerdene û rayberîya xo awan kerde. Sêwregi de reya ewil o ke komelêka kultur, huner û ziwanê Kurdkî yena akerdene. Rayberî awanîya ke seba komele ameya girewtene, nika restora keno. Dima ke restorasyon qedîya û awanî bêra amadekerdene do bi lehçeyanê kurmancî û kirmanckî dersî bêrê dayene. Reyna dersanê ziwanî ra vere do dersê pîyano, gîtar, xêzkarî û sînema zî bêrê dayene.
Rayberê Komela Cigêrayîş û Averberdişê Kultur û Ziwanê Kurdkî ya Sêwregi (ZIMAN-KURD) Mazlum Dogan Taniş derheqê amancê awankerdişê komele û xebatanê aye de ajansê ma rê qisey kerd.
‘Xebatêka winasîne heta nika şaristanê ma de nêbîbî’
Mazlum Dogan derheqê awankerdişê komele de wina vat: “Qandê 6-7 aşmî fikir ser o nîqaşî ameyê kerdene. Aşmêk ra ver ma rayberîya xo awan kerde û seba awankerdişî muracat kerd. Muracatê ma ame qebulkerdene. Dima dest bi restorekerdişê awanî kerd. Amancê ma cigêrayîş û averberdişê kultur, huner û ziwanê Kurdkî yo. Çi heyf ke heta nika xebatêka winasîne heta nika şaristanê ma de nêameye kerdene. Nê semedî ra ma waşt ke ma na vengîye pir bikerê. Û seba azanê neweyan ma bingeyêk awan bikerî.”
‘Piştgirîya şarê ma, ma keyfweş û sereberz kerd’
Mazlum Dogan Tanişî bale ant eleqeya şarî ya girde ya seba komele û wina dewam kerd: “Ma nêpawitêne ke zereyê Sêwregi de ma demêko kilm de hende lez bêrê naskerdene û piştgirîyêka hende girde biba. Piştgirîya şarê ma, ma xeylê keyfweş û sereberz kerd. Nê prosesî de awankerdişê komele de çi ciwan çi wendekar û çi kal û pîrî, hema vajê her roje ma xebatanê awankerdişî domnenê. Mîyanê roje de zîyaret, hetkarîya madî û manewî hetê şarî ra yena kerdene. Bi rastî wayîrvejîyayîşê şarî hem wezîfeyê ma gird kerdê û hem zî kerd ke bi hewayêko cîdî, coş û heyecan karê xo bikerê.”
