Komeleya Elewîyan a Demokratîkî (DAD) kongreya xo ya awarte ya 5’ine Dêrsim de viraşt. Hemserekê Pêroyî yê DAD’î Zeynel Kete kongre de qisey kerd û wina va: “Dêrsim, warê dayîk, baw û qalanê ma yo. Nameyê ma Rayîrê Heqî yo, ma ewladê Rayîrê Heqî yê.
DAD’î Kongreya xo ya awarte ya 5’ine Dêrsim de viraşt. Kongre ra zaf hûmarî de temsîlkarê sazîyanê sîvilî, welatijî beşdar bîyê.
Verê qiseykerdişan hunermend Beser Develî deyîran vatî, Mehmet Alî Seyîdogluyî gulbang va û çila veşnayî.
Dima zî Hemserekê Pêroyî yê DAD’î Zeynel Kete qisey kerd.
‘Rayîrê ma rayîrê demokratîkî yo’
Zeynel Kete wina qisey kerd: “Dêrsim, warê dayîk, baw û qalanê ma yo. Cayê Seyîd Riza, Alîşêr û Zarîfeye yo. Tarîxê Dêrsimî tarîxê xoserîye, merdimîye, komelî, xobîyayene, Rayîrê Heqî yo. Nameyê Rayîrê Heqî yo, ma ewladê Rayîrê Heqî yê. Hîna erd û esman nêameybi viraştene, Rayîrê ma estbi. Tarîxê ma wina kehen o. Tarîxê Dêrsim de tarîxê komelê demokratîkî bi, pîlanê ma her tim mîyanê komelê demokratîkî de ciwîyayê. Çike Rayîrê ma, rayîrê demokratîkî yo.”
Dima qiseykerdişan hemserekanê DAD’î ameyî weçînayene. Hemserekanê DAD’î yê ra Zeynel Kete û Mercan Gul ameyê weçînayene.
