Hemsereka Konseyê Rayberdişî ya KCK’yî Besê Xozat îfade kerd ke qerarê Kongreya 12. ya PKK’yî tena bi azadîya Rayber Apoyî eşkenê bikewê pratîkî û vat: “Tena Rayber Apo eşkeno şerwanan ra çekan bigêro.”
Hemsereka Konseyê Rayberdişî ya KCK’yî Besê Xozat beşdarê bernameyê taybetî yê Medya Haber TV’yî bîye û rojev erjna.
Qiseykerdişê Besê Xozate ra tayê noqtayê muhîmî wina yê:
“Ez şexsê embaz Fuat û Rizayî de pêro şehîdanê aşma gulane yad kena. Embaz Fuat 3ê temmuza 2018î de wexto ke akademî de perwerde dayêne netîceya hêrişê hewayî de şehîd bi. Embaz Riza û Fuatî kedêka pîle daye partî û ê tim bîyê perwerê Rayberîye.
2025î de ma dekewtî mîyanê qewimîyayîşanê giranan. Dewleta tirke heta nika rixmê pêro hêrişanê xo zî nêeşkaye têgêrayîşê azadîye çin bikera û aye derbê giranî werdî. Nê bîyî sebeb ke dewleta tirke neçaretîye ra Rayber Apoyî reyde pêvînayîşan bikera. Kurdan ser o xeylê hesabî û planî est ê. La Rayber Apoyî prosesî erjna, înîsîyatîf girewt. Vengdayîşê ey ser o PKK’yî kongreya xo kerde. Kongre bi perspektîfê Rayber Apoyî kom bîye. Kongre de qerarê fesihkerdişî û çekronayîşî ameyê girewtene. La ez naye vaja qerarê Kongreya 12. ya PKK’yî tena bi azadîya Rayber Apoyî eşkenê bikewê pratîkî. Tena Rayber Apo eşkeno şerwanan ra çekan bigêro. Eke Rayber Apo bi azadî nêeşko têbigêro mumkîn nîyo ke PKK çekan rono.
Kesî ke prosesê aştî nêwazenê rantwer ê. Ma dî ke Tirkîya de zaf rantwer est ê. Proses tayê dormeyan eciz keno. No şero ke 50 serrî yo dewam keno bîyo sebebê rijîyayîşê Tirkîya.
Partîya Zafer û ÎYÎ ûsn ra ber nêzdîbîyayîşê partîyanê bînan hol ê la qîm nêkenê. Ganî partîyê muxalîfî hîna zaf paştî bidê nê prosesî. Cuya hempare ganî pîya bêra awankerdene. Meseleya kurdan tena bi waştişê kurdan nêna çareserkerdene.
Prosesê Vengdayîşê Aştî û Komelê Demokratîkî prosesêko winayên o ke cinîyî eşkenê tede bi azadî xo îfade bikerê. Cinîyî merkezê nê prosesî de yê coka ê hîna zaf mesuldarî û erkan bigêrê xo ser.
Hema zî Herêmanê Pawitişî yê Medya de şer dewam keno. Dewlete hema zî şer de israr kena. Heta ke hêrişî dewam bikerê xora gerîlayî zî do cewab bidê. Ma kongre de derheqê şerî de tewirê xo mojna. Hinî eşkera yo ke kam şer wazeno.
Nêzdîbîyayîşê vera Mexmûrî ez şermezar kena. Iraq goreyê menfaetanê xo yê bi Tirkîya nêzdîyê Mexmûrî bena. Teda û operasyonê vera Mexmûrî meşrû nîyê. Ganî Iraq nêba hemparê kayanê gemarinan. Almanya zî bi nê hawayî ganî nê prosesî de tedayanê vera kurdan û dezgehanê kurdan ra fek vera bida.
Polîtîkayê Sûrîye yê Tirkîya dişmenîya vera kurdan ser o ronîyayê. Heta ke Tirkîya meseleya xo ya bi kurdan çareser nêkera, nêeşkena teber de bihêz biba. Ganî Tirkîya polîtîkayanê xo yê serê Sûrîye ra fek vera bida.”
