Çalakîyê Îran û Rojhelatê Kurdîstanî roja 12. dewam kenê. Hêzê rejîmî bi girewtiş û kiştişî cehd kenê ke çalakîyan vindarnê. Ame eşkerakerdene ke mîyanê 12 rojan de 2 hezar û 217 kesî ameyê destbendkerdene, tewr kêm 34 çalakîkerî ameyê qetilkerdene ke 5ê înan gede yê.
Çalakîyî ke 28ê kanûna 2025î ra pêroyê Îran û Rojhelatê Kurdîstanî de vera krîzê aborî, problemanê sîyasî û komelkî dest pêkerdê, dewam kenê. Rixmo ke rejîmê Îranî bi şeklêko tewr hişk nêzdîyê çalakîkean beno, her ke şono çalakîyî hîrayêr benê.
Hêzê rejîmî hêrişî çalakîkeran kenê
Goreyê dîmenanê ke toranê medya dîjîtal de ameyê parekerdene, roja 12. a çalakîyan de zî hêzê rejîmê bi hewayêko hişk hêrişê çalakîkeran keno. Kesê ke çalakîyan de birîndar benê, tersî ke do nêweşxaneyannde bêrê destbendkerdene, nêeşkenê şêrê nêweşxaneyan.
Her ke şono çalakîyî hîra benê
Çalakîyê şaranê Îranî 348 qeza, 11 şaristanok û 31 şaristananê Rojhelatê Kurdîstan û Îranî de vila bîyê. Heta nika 45 unîversîteyî seba paştî beşdarê çalakîyan bîyê.
Goreye agahîyan tayê şaristananê Kurdîstan û Îranî de hêzê ewleyî û Supayê Pasdaran şaristanî ra ameyê vetene, dikan û cayê pêroyî girewte yê.
2 hezar 217 kesî ameyê destbendkerdene
Heto bînî ra goreyê daneyanê Rêxistina Heqanê Merdiman (HRANA) 12 rojanê çalakîyan de 2 hezar û 217 kesî ameyê destbendkerdene, tewr kêm 34 çalakîkerî ameyê qetilkerdene, 5ê înan gede yê û bi desan çalakîkerî zî birîndar bîyê.
Hêzê rejîmê Îranî bi zorî, bêyî amadebîyayîşê avûkatan, îfadeyanê çalakîkeran gênê ke ameyê destbendkerdene û medyaya fermî ya Îranî ser o pare kenê.
