Hunermend Xelîl Xemgînî derheqê serewedaritişanê rojhelatê Kurdîstan û Îranî de mesajêk erşawit û vat: “Ma şarê kurdî ça benê wa bîbê, ganî ma piştgirîya serewedaritişanê şarê xo yê Rojhelatê Kurdîstanî bikerê.”
Çalakîyê rojhelatê Kurdîstan û Îranî roja 19. de dewam kenê. Çalakîyî ke semedê krîzê ekonomî dest pêkerdbî, vurîyayê serewedaritişê pêroyî. Xeylê şaristananê rojhelatê Kurdîstan û Îranî de bi mîlyonan kesî vejîyayê qadan û çalakî kerdê. Hunermend Xelîl Xemgînî seba paştîdayîşê çalakîyanê Rojhelatê Kurdîstan û Îranî mesajêko bidîmen pare kerd.
Hunermend Xelîl Xemgînî dîyar kerd proseso ke est o ver bi şerê hîreyîn şino û wina vat: “Seserra 21. de şarê kurdî qerardar o na reye do çarenusê xo, ameyoxê xo, bi xo binuso, tarîxê xo bi xo binuso. Heme dinya ra aseno ke estareyê şarê kurdî Rojhelatê Mîyanênî de çend şino berz benê û şewq danê.”
‘Her hetê Kurdîstanî de kêna û xortê kurdî çeperan de yê’
Xelîl Xemgînî dîyar kerd ke şarê kurdî û heme hetê Kurdîstanî serdemêko newe de yê û vat: “Bi fikranê newe bi terzêko newe hîna xurt ê û heyecanê înan hîna gird o, her hetê Kurdîstanî de kêna û xortê kurdan çeperan de yê. Vakur de şehîdî dayê, Başûr, Rojava û Rojhelat de. Hewteyêk ra ver ma hemînan dî ke xoverdayîşê Helebî virazîya û ê qirkerdişî rejîmê nîjadperest ê tirkan û çeteyanê aye ard şarê ma ser. Mesajê Fermandar Zîyad Qedûra ma hemînan eşnawit, dinya eşnawit, eke ma vateyê ‘eke ez şehîd biba zî ez dildarê şarê xo ya’ fam bikerê, ê mesajî de fermanêk est o.”
‘Lazim o ke her kes wezîfeyê xo bîyaro ca’
Xelî Xemgînî vengda heme partî û sazgehanê çar hetanê Kurdîstanî û vat: “Şarê ma ewro rojhelatê Kurdîstanî de serewadaritişêk de yo û wazeno ke heme qeyd û bendan bişikno, çerxanê zulmî birijno. Ma yewrêzîya partîyanê rojhelatê Kurdîstanî zaf pîroz vînenê. Sere de PJAK, Hîzbê Demokratîk ê Kurdîstanî, Komele û her hewt partîyanê bînan ma şima pîroz kenê. Heme partî û rêxistinê hetanê Kurdîstanî yê bînî tena sey temaşekerdoxa memanê, zaf muhîm o ke her kes wezîfeyê xo biyaro ca. Şarê ma yê Kurdîstanî wa pênêhesîyo ke paştîdayîşê înan çin o û ê tena yê.”
Xelîl Xemgînî peynî de wina vat: “Wextêkê xeylê giran, wextêkê xeylê bi hêvî û zaf zehmetî zî vernîya ma de yê. Ma şarê kurdî kamca de benê wa bibê, muhîm o ke ma paştîdayîşê serewedaritişê şarê xo yê Rojhelatê Kurdîstanî bikerê.”
