Fûarê Kitaban ê Amedî yo 9. dewam keno. Wendoxan waşt ke her kurdêk şêro fûar, weşananê Kurdkî nas bikero, kitabanê Kurdkî biherîno û biwano.
Fûarê Kitaban ê Amedî yo 9. ke bi hemkarîya Şaredarîya Amedî ya Şaristanê Girdî, DTSO, TUYAP Fûarcilik û YEW-KURD’î (Yewîya Weşangeranê Kurd) 183e teşrîna verêne de Merkezê Fuarî yê Mezopotamyayî yo Mîyanneteweyî de qezaya Yenîşehîr ya Amedî de dest pêkerd, roja çarine de dewam keno. Wendoxî ke beşdarê fûarî benê, derheqê fûar û muhîmîya wendişê Kurdkî de ajansê ma rê qisey kerd.
‘Wa her kurdêk weşananê Kurdkîyan nas bikero û Kurdkî biwano’
Wendoxa bi nameyê Solîn Peyman seba organîzekerdişê fûarê kitaban keyfweşîya xo ard ziwan û wina vat: “Fûarê kitaban de stadan ser o vînayîşê weşananê Kurdkî, seba ma wendoxanê Kurdkî keyfweşîyêka gird a. Lazim o fûaran de nê standî û xebatê Kurdkî est bî. Ez wazena her kurdêk bêro fûar û weşananê Kurdkî nas bikero, biwano û nuştox û şaîran reyde sohbet bikero. Derheqê ziwanî de pêşnîyaz û kitaban bigîrê.”
‘Ziwanê Kurdkî resayo qonaxêko baş’
Wendoxê bi nameyê Dilbirîn Dilo zî weşanxaneyanê Kurdkî û averşîyayîşê Kurdkî ser o qisey kerd û wina vat: “Nêzdîyê 30 weşanxaneyê Kurdkî fûar de ca gênê. No seba ma keyfweşî ya. La ma hema nêresayê a daraxe ke ziwanê Kurdkî şaristananê Kurdîstanî de bibo ziwano sereke. Ma hetê ziwanê Kurdkî de resayê qonaxêko baş la hema zî kemaneyî est ê.”
‘Ez seba kitabanê Kurdkîyan ameya fûar’
Wendox Şêxmus Ozpolat zî derheqê eleqeya ciwanan a kême de fikrê xo wina îfade kerdê: “Ez zî ewro seba kitabanê Kurdkîyan ameya fûar. Beşdarî goreyê her di rojanê destpêkê ewro kêm a û ez bawer a ver bi şandî do hîna xurt biba. Waştişê mi o yo ke hîna xurt biba. Weşanxaneyê ma hetê ekonomî ra zehmetî ancenê. Ez hêvî kena wendoxî vêş bibê ke kitabê neweyî bêrê çapkerdene. La çi heyf ke kitabê tirkî bale ancenê û herînayîş û rotişê înan hîna zaf bibo. Ez bawer kena ke kitabê Kurdkî zî bi nê hewayî bêrê rotiş. Mi dî ke bala ciwanan kitabanê Kurdkîyan ser o nîya û bi rastî beşdarîya ciwanan ewro zaf nîya.”
‘Wa gedeyî Kurdkî bimusê’
Wendox û dayîke Berfîn Yerger zî îfade kerd ke seba kênaya xo ya 3 serra ameya fûarê kitaban û wina vat: “Ez ewro bi taybetî zî seba kitabanê Kurdkîyan ameya fûar. Kênaya mi 3 serrîya x ode çi bimusa aye rê baş o. Wa gedeyîye de bimusa ke fikrê aye zî baş bibê. Aye eşkena şêra dibistan de tirkî bimusa la wa ewil Kurdkî bimusa.”
