Îpek Sarîye ke nika weşîya xo Agdad de ramnena, 94î ra dewlete dewa xo Axponos ra veta. Feqîrîye û heşîrîye dîya. Şarê xo re wayîrvejîyayîşê ser o wina vana: “Bêrê welatê xo şên bikere.”
Îpek Sarîye, 94î ra ver dewa Axponos ya Dêrsimî de weşîya xo ramita. 94î de dewlete banê înan vesnayê, caye înan çin bîyo. Kotî de ke caye dîyo, uca de mendê. Çar serrî yo ke keyeyê Zelîha Polat de dewar weye kena. Hetê aye de najnîye û birayê xo est ê. Îpek Sarîye, seba karî û wayîrvejîyayîşê welatî ser o ma rê qisey kerd.
‘Giranîye nê karî zaf a’
Îpek Sarîye, karê xo ser o wina vana: “Xeylê serrî yo ke dewar weye keno. Dewa ma Axponos a. 1994î de dewa ma kerde tal, bîme tever. Banê ma çin a, cayê ma çin o. La ma de najnîye mi est a. Jû bîrayê mi paştî danê mi. Karê ma zaf giran o. Zaf şîlî û şepelî est a. Vewre zaf a, simer qedîya. Alefe nîmend. Cayê ma çin bi, Zelîfa Polat, paştî daye ma. Dewa Agdad de le hûrenîye xo de ma rê ca da. Şî heqîya xo, welatê ma bêkes mend.”
‘Bêrê herindanê pî û kalikanê xo’
Îpek Sarîye, wayîrvejîyayîşê hardê welatê xo ser o qisey kerd û wina vat: “Zelîha Polat, welatê xo rê wayîr vejîyaye. Herindê pî û kalikê xo kerd şên. Darî ronayê, banî viraştê. Cîrananê xo rê rind bîye. Nika şîye heqîya xo, cayedî ci cenet bo. Ma zaf heşîrîye û feqirîye dîme. Ma welate xo re wayîr vejîyîme, bon viracîme zon re wayîr vecîme. Dêrsim re wayîr vecîme.”
