Dewê qezaya Dêrsimî Pilemurîye, Karagoz, Dagbek, Çakirkaya, Kovuklu, Kaymaztepe, Mezra, Kocatepe binê tehlukeyê madenê kromî de yê. Şîrketê ‘Dimin Madencilik’ wazena nê waran de maden akero. No proje verê cû bi nerazîbîyayîşê şarî amebi betalkerdene, labelê şîrket reyna kewt dewre û seba raporê ÇED’î reyna muracaat kerd.
Goreyê xeberan, roja 13ê nîsana 2026î de komîsyon do kombîyayîşêk virazo û derheqê nê projeyî de qerar bido. Derûdorê zanayeyî û dewijî vanê ke maden do zof zerar bido xoza, zîraet û weşîya merdiman. Dewijanê nê dewan ajansê PÎRHA rê qisey kerd.
‘Ma herre û xozaya xo de maden nêwazenê’
Muxtarê dewa Kocatepeyî Baki Firatî dîyar kerd ke şîrketî serra 2024î de zî waştbi maden akero, labelê bi protestoyanê şarî amebi vindarnayene. Firatî vat: “Şîrketî reyna kewt waranê ma dima. Ma heta ewro destûr nêda, naye ra tepîya zî ma nêverdanê ke zîyaretgehê ma û warê heywananê ma bêrê xirabkerdene.”
‘Maden bêro akerdene heywandarîye qedîyena’
Muxtarê dewa Dagbekî Ahmet Dogan zî bal ant serê zerarê madenî û vat: “Na herême de 20 warê est ê û 10 hezarî ra zêdêr heywanî nê qadan de yenê çerinayene. Eke maden bêro akerdene, heywandarîye û hingdarîye qedîyena. Reyna, nê wareyî seba bawerîya ma pîroz ê; herêma Bûyer Ana û Çemê Pîlî binê tehluke de manenê. Ma madenê kromî nêwazenê.”
