Komîsyonê Hepisxaneyan ê ÎHD’yî yê Stenbolî derheqê Gurkan Turkogluyî de ke vera tecrît û hepisxaneyanê sey bîran çalakîya vêşanîye de dinyaya xo bedilnaybî, eşkerayî daye. Komîsyonî dîyar kerd ke hepisxanyê sey bîran ke sey cayê îşkenceyî ameyê awankerdiş, wa nê hepisxaneyî bêrê girewtiş û waştişê kesanê ke ewro çalakîya roşanê mergî de yê, bêrê qebulkerdene.
Girewteyê bi nameyê Tahsîn Sagaltici, Gurkan Turkoglu û Huseyîn Ozen ke Hepisxaneyê Ewleyîya Berze ya Antalya de vera tecrît û hepisxaneyanê ke sey ‘bîrî’ yenê pênasekerdene tîpê YGC, Y û S’yî xover danê. Tahsîn Sagaltici û Gurkan Turkoglu 266 rojî û Huseyîn Ozeno 57 serrî zî 247 rojî çalakîya vêşanîye kerdbî. Badê 21ê nîsane waştişê înan ameyî qebulkerdene û çalakî qedênaye. Gurkan Turkoglu 3 aşm bi ke Nêweşxaneyê Şaristanî yê Antalya de çimdarîya awarte de ameyêne dermankerdene. Gurkan Turkoglu nêweşxane de badê dermanbîyayîşê 3 aşman, 5ê temmeze de dinyaya xo bedilnaye. Komîsyonê Hepisxaneyan ê ÎHD’yî yê Stenbolî seba Gurkan Turkogluyî awanÎya xo ya Beyoglu de eşkerayî daye. Endam û rayberê ÎHD’yî yê Stenbolî û xeylê avukatê heqanê merdiman beşdarê eşkerayî bîyê.
Eşkerayî hetê Hemverfeka Komîsyonê Hepisxaneyan ê ÎHD’yî ya Stenbolî Meral Şahîn ra ameye wendene.
‘Wa hepisxaneyê sey bîran bêrê girewtiş’
Meral Şahîn dîyar kerd ke ganî hepisxaneyê sey bîran bêrê girewtiş û wina qisey kerd: “Hepisxaneyê her wext bi kerdişê îşkenceyan û binpaykerdişê heqanê merdiman yenê rojev. Binpaykerdişê heqan, xokiştişî, nêweşî û kiştişê girewteyan raporan de ca gênê. Girewteyê hepisxaneyan de û hucreyanê yewkesan de yenê girewtene, kesanê bînan ra dûrî yenê tewqîfkerdene. Pêro nê hedîseyî tewr zaf hepisxaneyanê sey bîran de qewimîyenê. Hepisxaneyê bîran de seke merdim asmanî ser o ewnîyeno wina aseno. Hepisxaneyê tîpê S, Y û ewleyîya berze hetê mîmarî ra zî sey cayê îşkence yê. Seba tecrîdkerdişê girewtişê ameyê awankerdiş. Ewro xeylê sîyasetmedarî û kesê muxalîfî hepisxaneyê sey bîran de yenê girewtiş. Ewro xeylê kesî vera hepisxaneyê bîran çalakîya veşanîtye de yê. Gurkan Turkoglu zî nê 3 aşmî bi ke Nêweşxaneyê Şaristanî yê Antalya de ameyênw dermankerdene. Gurkan Turkoglu 266 rojî vera hepisxaneyanê bîran çalakî viraştbî û 5ê temmuze de dinyaya xo bedilnaye. Gurkan Turkoglu verê ke dinyaya xo bedilno bi zor amebi dermankerdene. Ma wazenî ke nê hepisxaneyî ke seba tecrîdkerdişê girewteyan sey cayê îşkenceyî ameyê awankerdiş bêrê girewtiş û ma veng danî ke ewro waştişê kesanê ke çalakîya roşanê mergî de yê bêrê qebulkerdene.”
