Merdimê Vîndîbîyayan û Şûbeyanê ÎHD’yî yê Amed, Êlih û Colemêrgî no hewte zî çalakîya xo domna. Çalakîyanê nê hewteye de aqûbeta Îbrahîm Gundem û Hecî Atalayî ame persayene û ame waştene ke faîlê Saît Akinî bêrê muhakemekerdene. Çalakîye de sewbîna zanayoxo kurd Mûsa Anter zî ame vîr ardene.
Merdimê Vîndîbîyayan û Şûbeyanê ÎHD’yî yê Amed, Êlih û Colemêrgî no hewte zî çalakîya xo ya “Wa Vîndîkerdeyî Bêrê Vînayene, Faîlî Bêrê Muhakemekerdene” ke her hewte virazenê, domna. Çalakîyanê nê hewteyî de aqûbeta Îbrahîm Gundem û Hecî Atalayî ame persayene û ame waştene ke faîlê Saît Akinî bêrê muhakemekerdene. Çalakîya Colemêrgî de nuştox, rojnamegêr û zanayoxo kurd Mûsa Anter, ke 20ê êlula 1992î de hetê JÎTEM’î ra ame kiştene, ame vîr ardene.
AMED
Merdimê Vîndîbîyayan û rayberanê Şûbeya ÎHD’yî ya Amedî, çalakîya xo ya “Wa Vîndîkerdeyî Bêrê Vînayene, Faîlî Bêrê Muhakemekerdene” hewteyo 919. de, verê Abîdeya Heqê Cuyayîşî ya Parka Koşûyolûyî ya qezaya Rezanî ya Amedî de viraşt. Pawitoxê heqê merdiman, endam û rayberanê sazgehanê sîvîl ê komelkî û merdimê vîndîbîyayan tewrê çalakîye bîyî. Çalakîye de fotografê kesê ke ameyê vîndîkerdene ameyê berzkerdene.
ÎHD û merdimê vîndîbîyayan, çalakîya nê hewteyî de aqûbeta Îbrahîm Gundemî, ke 25ê êlula 1991î de dewa Qenderhelê Hezoyî de ame vîndîkerdene, persa.
Endamê Komîsyonê Vîndîbîyayan ê ÎHD’yî Firat Akdenîzî destpêkê çalakîya nê hewteyî de qisey kerd û wina va: “Ma do tu wext şopê kesanê ke ameyê vîndîkerdene veranêdanê. Her çiqas badê desan serran ma bizanê ke endî vîndîbîyayê ma nêcuyenê zî, ma pey estîyanê înan ê. Hewteyo vîyarte seba cangorîyan vîrardiş ameyê viraştene û ê şîn û vîrardiş kêm ê. Semedo ke nê dayîkan cenazeyê gedeyanê xo nêdî û nêeşkayê şîna xo bikerê, dejê înan zî kêm nêbeno. Ganî her kes bieşko cenazayanê vîndîbîyayanê xo bigêro ke dejê înan kêmî bibo.”
‘Ma wazenê kesê berpirsîyar bêrê muhakemekerdene’
Badê qiseykerdena Firat Akdenîzî, waya Îbrahîm Gundemî, Ferîde Gundemî ard vîr ke birayê aye hetê leşkeran ra keyeyî ra ame vetene û wina qisey kerd: “Birayê mi verê çimanê mi berdî û kesê ke berdî leşker bîyî. Ê kesan ra yew zî leşkerêk bi nameyê Kenan Şahîn bi. Ma ewro wazenê nê kes û kesê berpirsîyarî bêrê muhakemekerdene.”
‘Ma hewl danê şerê bi desan serran bi aştîyêk domdare biqedîyo’
Parlamenterê Yeni Partî yê Amedî Sezgîn Tanrikulî zî dîyar kerd ke ganî şerê bi desan serran dewam keno, endî bi aştîyêka domdare biqedîyo û wina va: “Ma prosesêko xeylî muhîmî ra derbaz benê û ma hewl danê şerê bi desan serran bi aştîyêka domdare biqedîyo. Heta ke heqîqetê vîndîbîyayan nêvejîyo meydan û edalet nêro nê qadanê ke ma tede şîn gênê de aştîyêka domdare nêvirazêna. Taybetî maddê 7. ya qanûnê çarçewaye qala edaletî kena û ganî edalet seba her kesî bi ca bêro.”
Endamê Şûbeya ÎHD’yî ya Amedî Bawer Çîndemîrî hîkayeya vîndîkerdena Îbrahîm Gundemî wend û badê wendena hîkayeya vîndîkerdena Îbrahîm Gundemî, eşkerayî bi çalakîya roniştişî qedîya.
ÊLIH
Merdimê Vîndîbîyayan û rayberanê Şûbeya Komela Heqê Merdiman (ÎHD) a Êlihî, hewteyo 755. de çalakîya xo ya “Wa Vîndîkerdeyî Bêrê Vînayene û Faîlî Bêrê Muhakemekerdene” verê Abîdeya Heqê Merdiman a Cadeya Gulistanî de viraşt. Rayber û endamanê ÎHD’yî û Merdimê Vîndîbîyayan û xeylî kesî tewrê çalakîye bîyî û fotografê kesanê ke destbendî de ameyê kiştene û vîndîkerdene ameyê berzkerdene. Çalakîya nê hewteye de aqûbeta Hecî Atalayî, ke 10ê êlulê 1996î de qezaya Pîranî ya Amedî de, wexto ke bexçeyê xo aw dayene, hetê Mudirîyeta Ewlekarîya qezaya Pîranî ra ame remnayene û a roje ra nat tu agahî ey ra nêama girewtene, ame persayene. Endamê ÎHD’yî yê Êlihî Huseyîn Elçîyî hîkayeya Hecî Atalayî wend.
Eşkerayî bi deqîqeyêk çalakîya roniştişî qedîya.
COLEMÊRG
Şûbeyê Komela Heqê Merdiman (ÎHD) a Colemêrgî û Merdimê Vîndîbîyayan zî çalakîya xo ya “Wa Vîndîkerdeyî Bêrê Vînayene, Faîlî Bêrê Muhakemekerdene” hewteya 245. de Kuçeyê Hunerî yê Geverî de viraşt. Çalakîya nê hewteyî de aqûbeta Saît Akinî, ke 25ê êlula 1995î de dewa Befircana qezaya Geverî de ame destbendkerdene û kiştene, ame persayene. Eşkerayî hetê Hemserekê Şûbeya ÎHD’yî yê Colemêrgî Ozan Akbaşî ra ame wendene. Eşkerayîye de ame dîyar kerdene ke 30 serrî yo ke faîlê Saît Akinî nêameyê muhakemekerdene.
Eynî eşkerayîye de nuştox, rojnamegêr û zanayox Mûsa Anter, ke 20ê êlule 1992î de hetê JÎTEM’î ra amebî kiştene, ame vîr ardene.
Eşkerayî bi çalakîya roniştişî qedîya.
