Hemverfekanê Komîsyonê Ziwan, Kultur û Hunerî yê DEM Partîye Cemîle Turhalli û Heval Dilbaharî bertek nîşanê zîhnîyetê faşîstî yê xebatkaranê Pegasusî rê da û dîyar kerdî ke ganî kurdan ra ozrê xo biwazê û kurdkî warê pêroyî de bibo wayîrê statuyî.
Roja 10 Hezîrane de verê wardişê teyara yê Stenbol û amedî de, qalûpîrêkê tirkî nêzanaynî, hetê hostesan teyara ra bi zorî ameyê cêrardiş, heqeret înan ra ame kerdiş. Teyarageh de welatijan bertekê hostesan nîşan dayî la belê hostesan vatî ke welatijê Tirkîya mecburo ke tirkî bizanî.
Welatijan ser nê vatişî bertek nîşan dayî û eşkera kerdî ke no dem seba xizmetê bi ziwanê dayîke wa açarnayox bêro şuxulnayîş la belê hostesan welatijan ra zî heqet kerdê.
Ame rojdemê Meclîsî
Cigîra Koma Meclîsî ya DEM Partîye Gulistan Kiliç Koçyîgîte zî na babete ard rojeva meclîsî û bertek nîşanî nêzdîbîyayîşê hostesanê Pegasusî û dîyar kerd ke ê nê tewir nêzdîbîyayîşê faşîstî qebul nêkenê.
Rêz nêdo ziwanê to, rêz nêdano to zî…
Hemverfeka Komîsyonê Ziwan, Kultur û Hunerî yê DEM Partîye Cemîle Turhalli babete ser o destnîşan kerd ke na mesele newe nîya, wina aseno ke peynî zî nêbena û wina va: “Her ca, wara pêroyî de çi heyf ke hêriş ser ziwanê kurdkî beno. No hêriş zî gede û qalûpîran de xo nîşan dano, kokiman ser o xo mojneno. Tirkîya de asîmîlasyon sîstemêko her ca de vengî nêveradano, bi zorî ziwanê xo dekeno. Wara xizmetî de şerto ke rêz û hurmetî bibo, yew rêz nêdo ziwanê to, rêz nêdano to zî. Ma nê nêzdîbîyayîş qebul nêkenê, no ser ganî ziwan kurdkî warê pêroyî de bêro garantîkerdene û statuyê ci bibo. Eke statuyê ziwanê kurdkî bibo, nê cîyayî zî nêbeno, no numune eşkakerdişê yew polîtîkayêk o, no ser ferzêko ziwanê kurdkî bêro qebulkerdene. Eke wina nêbînî yew karker ya zî karmend nêeşkîyaynî wina bivatî, nika nêweşxaneyan de zaf welatijî nêeşkenî xo bi tirkî îfade bikerî û wazenî xo bi kurdkî îfade bikerî la hêriş şaristananê rojawanî yê Tirkîya de ser înan de virazîyeno. No ser ganî ziwanê însanî bêro qebulkerdiş, waştişê ma yê sereke wina aseno ke şerto ke warê pêroyî de ziwanê kurdkî bibo wayîrê statuyî û bibo fermî.”
Wa kurdan ra ozrê xo biwazê
Hemverfekê Komîsyonê Ziwan, Kultur û Hunerî yê DEM Partîye Heval Dilbihar babete ra bertek nîşan da û wina va: “Ma rayêko bîn vanî ke hemeyê nêheqîyanê vera ziwanê kurdkî û ercnayîşanê neteweyê kurdî, çalakîyê vera neteweyê kurd û merdimeyîye yê û no yew sûcêko gird o vera merdimeyîye yo. Parçeyêko qirkerdişî yo. Seserra 21ine de qewimîyayîşê nêheqîyanê vera yew ziwanî, hovîtîyêka nijadperestî ya. Ma heme nêheqîyanê vera ziwanê kurdkî û heme ercnayîşanê neteweyê kurdî şermezar û nelet kenî. Ganî wayîrê nêheqîyanê vera ziwanê kurdkî û kurdan ra ozrê xo bîwazî, xebate û xizmetanê xo bi ziwanê kurdkî zî bîyarî ca.”
Ma tu rayî bêveng nêmanenî
Heval Dilbahar eşkera kerd ke ganî weş bêro zanayene ke vera kurdkî de tu nêheqîyanê hovîyan û ercnayîşanê xo yê neteweyî bêveng nêmanenî û wina qedîna: “Ma do têkoşîna xo berzêr bikerî. Bi na wesîle ma reyêko bîn veng danî heme kurdan ke vera hovîtîyanê nê rengî her ca de têkoşînê xo yê seba ziwanê kurdkî berzêr û hera bikerî; ma kurdkî bikerî wayîrê statuyî.”
