Platformê Ked û Demokrasî yê Dêrsimî seba hêrişanê ke hetê grûbanê ke girêdayeyê HTŞ yê Sûrîye de vera elewîyan yenê kerdene, reaksîyon nîşan bidê, eşkarayîyêk daye. Parlamentera DEM Partî ya Dêrsimî Ayten Kordu zî tewrê ci bîye.
Platformê Ked û Demokrasîyî yê Dêrsimî seba hêrişanê ke Sûrîye de vera elewîyan yenê kerdene, reaksîyon nîşan da û eşkarayîyêk daye. Eşkerayîyêka xeylê kesî tewrê ci biyê, Kuçeya Hunerî de bi rayîrşîyayîşî dest pêkerd. Rayîrşîyayîşî ra pey Meydanê Seyîd Riza de eşkerayî ameye dayene. Eşkerayî de hêrişê ke vera elewîyan Sûrîye de yenê kerdene ameyê şermezarkerdene û ame waştene ke piştîyê ke dîyenê HTŞ’yî ganî bêrê vindarnayene. Eşkerayî de wina ame vatene:
‘Bawerîyî yenê hedef girewtene’
“Merdimîye, bingeyê yew îdealî ser o awan bîyê ke tede kes semedê nasname û bawerîya xo ya sifete ra tehdît nêbeno, her kes seypê û bi rûmet ciwîyeno. La çîyo ke Sûrîye de qewimîyeno, mojneno ke no prensîbo bingeyî bi hovane yeno înkarkerdene. Merdimî, tena seba nasname û bawerîya xo tehdît benê, marûzê hêrîşanê sîstematîkî benê. Na polîtîka ke wazena bawerî û nasnameyê yew komele orte ra wedardo, tena ê şarî rê nê, erjanê merdimîye yê pêroyî rê tehdîdêk o û sûc o. Cayê ke însanî seba nasnameyê ci yenê kiştiş, cayo ke tede zilm hukim keno, edalete nêno hesibnayene uca merdimîye kewena binê herre.
Na tarîtîye tewr eşkera, qirkerdişê sîstematîkî yê Elewîyan ê ke Sûrîye de yê û HTŞ yo ke mendeyê El-Qaîde û DAÎŞî yo û piştîdayîşê hêzanê globalan reyde ameyo îqtîdar, zilmê înan keno. HTŞ demo ke îdarekerdişê herême xodestvisto ra nat, elewîyan tehdît keno û înfaz, tecawiz, xesp û kerdişanê ke vera merdimîye yê, keno. Hefteyêk verê cû ra nat bi taybetî cayê Lazkîye, Humus û Tartusî ra dîmenê ke vînayîşî înan gonîya merdim cemidneno, mojneno ke qirkerdişî hîna zaf bîyê. Tayê çimeyî hûmara şarê elewî yo ke ameyo kiştiş bi seyan o la rojnamegerê herêmkî dîyar kenê ke humara raştî do hîna zêde ba.
Rêxistinê cîhadî ke bi saya HTŞ’yî ameyê têhet, hêrs û kînê xo yê vera rejîmê Esadî yewbînî kerda, bi dişmenîya tarîxî ya elewîyan dest bi qirkerdişan kerdo. Kiştişê hovane Rasha Al-Alî ya ke zanaye, akademîsyen û bi nasnameyê cinîya elewî yena şinasnayene, bi derdêko giran mojneno ke nê hêrîşî bi taybetî cinî û domanan ser o yê.
‘Wa îqtîdar polîtîkayanê dînî û netewperestîyan ra fek verado’
Şerê ke şaranê Sûrîye bi serran o ke bedelê girdî dayê, bi polîtîkayê neteweyî û dînî reyde nêqedîyenê. No bi tecrubeyanê giranan ameyo îspatkerdiş. Ameyoxê azad û demokratîkî yê Sûrîye elewî, kurd, durzî, ereb, xiristîyan û komelê bînê ke uca de yê, bi hîrakerdişê zemînê cuyêka hempar reyde do eşkero bibo.
Ewro, rayê pêroyî ya demokratîke ya Tirkîye, şarê elewî û însanetîya dinya, no hetî ra eşkenê zaf çîyan bikê. Na demê ke “Bîyayîşê Xizirê yewbînî” îhtîyaco bêvindertiş o, ganî ma rîyê xo tadê hem canê ma yê Sûrîye de û her cayê ke ma tede manenê, ganî ma vengê xo berz bikê û qirkerdişan seke seyirkar temaşe mekerê.
Hetêkê ra, ganî îşaret bêro kerdene ke cayê pêvajuyîşê Tirkîye şerê Sûrîye de, yew girêdayîş rasterastî reyde vera Elewîyan ziwanê kîn, nefret û heqaretî cidî zerê de berz bîyo. Nuştoxê rojnameya Yeni Şafak, eşkera dijmenîya Elewîyan kena ke heta resaya noqta pawitişê qirkerdişan, medyaya sosyalî de bi seyan hesaban mesajê pîrozî yê nê qirkerdişan pare kenê. Dadgerî tena nê çîyan temaşe keno. Nê vatişê kîn û parîya suç o ke normal aseno, ganî destur nêdîyo ci û kesê ke berpirsîyar ê, ganî hesab bidê.
Ma Dêrsim ra veng danê! Vera vatişê ke berz bîyê, nefret û heqaretî yo ke vera elewîyan o, ganî dadgerî bilez tedbîr bigîro. Hukmê sîyasî ganî politîkayê ke Rojhelatê Mîyanênî de xeta dîn û netewperestîye ser o yê, înan ravfek verado. Sey Platforme Ked û Demokrasîyî yê Dêrsimî ewil Tirkîya dima dewletê emperyalîst û hêzê herêmî, ma pawenê ke her tewir destegê malî, lojîstîk û eskerî yo ke HTŞ rê danê, bilez bibêrnê. Polîtîkayê qirkerdiş, cîyakerdox û tehdîtkarî yê ke Sûrîye de est ê, vera erjê pêroyî yê merdimîye yê û kerdoxî ganî vera dadgerî hesab bidê. Ma paweyê raya pêroyîya mîyanneteweyî û şaranê xo yê ke hemparîya xo bi şaranê Sûrîye reyde gird bikê û heme sucan ke vera merdimîye yê, xover bidê.”
PLATFORMÊ KED Û DEMOKRASÎ YÊ DÊRSIMÎ
