Pêvînayîşê heyetê Rayberîya Xoserî û Amerîka yê ke Urdun de ame kerdene de, babetê entegrasyonê demokratîkî û sîstemê adem-î merkezîyetî ameyî qiseykerdene.
Roja 25ê Tebaxe (2025) de paytextê Urdunî Emman de, mîyanê heyetê Amerîka yo ke Senatora Amerîka Jeanne Shaheen û endamê Kongreya Amerîka Joe Wilsonî ra yeno pê û heyetê Rayberîya Xoserî yê Vakur û Rojhelatê Sûrîye yo ke Fermandarê Pêroyî yê QSD’î Mazlûm Ebdî û Hemsereka Daîreyê Têkilîyanê Teberî Îlham Ehmedî ra yeno pê, yew pêvînayîş virazîya.
Kombîyayîş ra dima amebi vatene ke pêvînayîş de caardîşê Pêameyîşê 10ê Adare ya ke mîyanê Fermandarê Pêroyî yê QSD’î Mazlûm Ebdî û Serekê Hukmatê Şamî Ehmed El Şerî de, ameyo munaqeşekerdene. Hem zî heyetê DYA paştîdayîşê xo yê seba QSD ard ziwan.
Goreyê agahîyanê ke çimeyêkê Rayberîya Xoserî dayê ANHA, pêvînayîş de muzakereyê mîyanê Rayberîya Xoserî û Hukmatê Şamî, astengîyê ke vejyênê werte û çareserîya pirsgirêkan zî ameyî qiseykerdene.
Çarçewaya pergalê adem-î merkezîyetî de babeta entegrasyonî ameya munaqeşekerdene û serê senîbîyayîşê ci de ameyo vindertene.
Çimeyî da zanayene ke xebatî seba pêvînayîşanê Rayberîya Xoserî û Hukmatê Şamî dewam kenê la no pêvînayîş do key virazîyo dîyar nîyo.
