Hemserekê Pêroyî yê DEM Partî Tuncer Bakirhan ke kombîyayîşê partîya xo de qisey kerd, derheqê hedîseyanê Vakur û Rojhelatê Sûrîye de îfade kerd ke dayîşûgirewtişê mabênê Rayberîya Xosere û hukmatê Şamî de muhîm ê û vat: “Ganî Tirkîya zî Rayberîya Xosere reyde têkilî rona.”
Hemserekê Pêroyî yê Partîya Têduştî û Demokrasî ya Şaran (DEM Partî) Tuncer Bakirhan meclîs de kombîyayîşê partîya xo de derheqê hedîseyanê rojeve de qisey kerd. Tuncer Bakirhan serrgêra kiştişê kedkarê Çapemenîya Azade Kadrî Bagdu de ey ard xo vîr û dest bi qiseykerdişî kerd. Tuncer Bakirhanî îfade kerd je Kadrî Bagdu demo ke rojname vila kerdêne, Edene de hetê DAÎŞ’î ra ame kiştene û nika zî rojnameger Hakan Tosun ame kiştene û vat ke ganî kiştoxî bêrê vînayene û cezakerdene. Tuncer Bakirhanî dîyar kerd ke rixmo ke serrêk vîyarta zî kiştoxê Rojîn Kabaîş zî nêameyê cezakerdene û waşt ke kiştoxî bilez bêrê vînayene û cezakerdene.
Dewamê qiseykerdişê xo de Tuncer Bakirhanî bal ant prosesê Aştî û Komelê Demokratîk û hedîseyanê peyênan ser o û wina vat: “Ma serdemêko zaf muhîm ra vîyarenê. Hedîseyê muhîmî qewimîyenê. Komîsyono binê banê Meclîsî de ameyo awankerdene zaf muhîm o. No komîsyon meseleyo ke se serrî yo rojeve de yo, seba çareserkerdişê ey zaf muhîm o. Heme kesê ke komîsyonî de ameyê goşdarîkerdene, tewrê fikranê cîyayan, waştişo hempar ê aştî kerd û seba heqê hêvî waşt ke gamî bêrê eştene. Ma do têkoşînê xo bidomnê.”
‘Ganî komîsyon bilez birêz Ocalanî zî bigoşdaro’
Dewamê qiseykerdişê xo de Tuncer Bakirhanî dîyar kerd ke ganî komîsyon êdî Rayberê Şarê Kurdî Abdullah Ocalanî zî bigoşdaro û wina domna: “Birêz Ocalan demo ke qisey keno, bingeyê çareserî xurt keno. Her ke birêz Ocalanî qisey kerd, çareserî û aştî aver şîyêne. Ma pêrûnan dî ke Birêz Ocalanî bi perspektîfê aştî yo ke pêşkêş kerd, prosesî roşnî kerd. Ganî ma pêvînayîşî Ocalan reyde nêkerê tabûyêk. Şar hêvî keno ke telîmatnameyê ke goreyê qeraranê DMME’yî û îradeyê şarî mojnenê, bêrê ca. Her kes paweno ke gamê seba veradayîşê embazanê ma yê dewaya Kobanî ra yenê muhakemerkerdene, Demîrtaş, Yuksekdag û heme embazê ma veradîyê.”
‘Ma heqê perwerdeyê ziwanê dayîke wazenê’
Tuncer Bakirhan îfade kerd ke sey DEM Partî nê, seba pêroyê Tirkîya têkoşînê edalet û demokrasîyî danê û vat: “Ma hemwelatîbîyayîşêko destûrî wazenê ke her kes bi hewayêko têduşt û pîya biciwîyo. Ma serwerîya huqûqî wazenê, rejîmêko bêserûberî nê. Ma heqanê xo yê rewa wazenê. Ma heqê perwerdeyîya bi ziwanê dayîke wazenê. Ma waştişê veradayîşê girewteyanê nêweş û sîyasî wazenê. Ma sererastkerdişêko qanûnî wazenê. Ma betalkerdişê qanûnê terorî û qanûnanê têduşt wazenê. Nê waştişanê ma ra kamcîn şaş ê? Ma nê waştişan seba pêroyê Tirkîya kenê. Her ke behsê aştî û dayîşûgirewtişan beno, ma sey DEM Partî terefgirê îqtîdarî nîşan danê. Ma zî vanê ma terefgirê tu kesî nîyê. Ma rayîro hîrêyîn ê. Ma hetê karker, şar û bindestan de yê.”
Hedîseyê Sûrîye û Xezayî
Tuncer Bakirhan bale ant hedîseyanê Xeza û peymana aştî û vat ke adirbest muhîm o ka seba çareserîyêka menda ganî waştişê şarê Filîstînî bêrê ca. Tuncer Bakirhan derheqê hedîseyanê Vakur û Rojhelatê Sûrîye zî nê çîyî vatî: “Vanê Rayberîya Xosere ya Vakur û Rojhelatê Sûrîye girêdayeyê peymana 10ê Adare yo. La no rast nîyo. Peymana 10ê Adare gamêka muhîm a ke hetê hetanê Sûrîye ra ver bi çareserîyêka demokratîke ra ameya eştene. Temsîlkarî û beşdarbîyayîşêko têduşt mîyanê xo de girewtêne. Kam goreyê peymane tênêgêra? Hukmatê Şamî. Tena sereyê xo destûrêk eşkera kerd. Ne kurd, ne durzî, ne elewî û ne zî temsîlkarê Sûrîye na peymane de ca nêgirewtêne. Rojhelatê Mîyanênî de hêzo ke wazeno probleman bi rayîrê sîyasetî çareser bikero, Vakur û Rojhelatê Sûrîye yo. Fermandarê HSD’yî Mazlum Ebdî vat grûbêka leşkerî do seba entegrasyonî şêra Şam. Şam de kombîyayîş ame kerdene. Dayîşûgirewtişî dewam kenê. Ez hêvî kena ke nê dayîşûgirewtişî xo reyde çareserî bîyarê. Ganî Tirkîya Vakur û Rojhelatê Sûrîye reyde têkilîyêka sîyasî ya rasterast bikera. Ê hukmatê demkî yê Şamî reyde têkilî de yê. Ganî Tirkîya Rayberîya Xosere ya Vakur û Rojhelatê Sûrîye redye têkilîyêka rasterast rona.”
Peynîya qiseykerdişê xo de Tuncer Bakirhanî derheqê ekonomî û butçeya serra newa de zî dîyar kerd ke butçeya serra newa wa biba butçeya aştî ke heme welatijî tira îstîfade kenê.
