Hemsereka DEM Partî ya Pêroyî Tulay Hatîmogûllari îfade kerd ke dora berpirsîyarîye êdî ya dewlete ya û va: “Ma paweyê ke goreyê na berpirsîyarîye hereket bikerê. Seba çareserîya demokratîke ganî îradeyo sîyasî bêro nîşandayene.”
Hemsereka Partîya Têduştî û Demokrasîyî ya Şaran (DEM Partî) ya Pêroyî Tulay Hatîmogûllari kombîyayîşê grûba partîya xo ya ke Meclîs de yena kerdene, qisey kerd.
Tulay Hatîmogûllari bale ant rewşa weşîya endamê Heyetê DEM Partî yê Îmraliyî Sirri Sureyya Onder ser o û vat: “Ma hêvîya xo dest nêdaye, ma dest ra nêdanê.”
Tulay Hatîmogûllari dîyar kerd ke Rayberê Şarê Kurdî Abdullah Ocalanî “Vengdayîşê Aştî û Komelo Demokratîk” reyde ke 27ê sibate eşkera kerd, demêko newe da destpêkerdene û wina va: “No vengdayîş vengdayîşê seba girdkerdişê aştî û demokrasî yo. Aştî seba kedkaran qasê nanî muhîm a. Demanê aştî de têkoşînê seba nanî hîna tesîrdare û netîcegir a. Komelo demokratîk garantîya cuya bindestan û karkeran o.”
Tulay Hatîmogûllari vengda kedkar û şaran ke 1ê Gulane de şêrê meydanan.
Tulay Hatîmogûllari Konferansê Yewrêzîya Kurdî ya Rojava ke 26ê nîsane de yewbînan de kom bî silam kerd û va: “Qerarê ke konferans de ameyî girewtiş, sere de şarê Kurdî seba şaranê Sûrîye û Rojhelatê Mîyanênî ma hêvîdar ê do aştî bîyarê.”
‘Ma pawitişê dewlete de yê ke bi berpirsîyarî hereket bikera’
Tulay Hatîmogûllari wina qisey kerd: “Vêrê ma aştî pê huqûqî awan bikerê, pê demokrasî bi heybet bikerê û ameyoxê nê welatî rê dîyarî bikerê. Hewtayêk ra ver heyetê ma Wezîrê Edaletî reyde pêvînayîşêko muhîm kerd. Bawer bikerê badê nê pêvînayîşî her embazê ma yê parlamenterî, serekwekîlê grûba ma, hemserekê ma, her roj bi desan telefonî girewtî. Persenê ‘Do se bo? Gelo paketa edaletî de do çi bibo? Gelo domanê ma do bikewê ver?’ Ma zaf persanê winasînan reyde yenê têrî. Pawitişê komelî zaf gird o.
Heyetê ma nê pêvînayîşî de seba awankerdişê zemînê aştî û çareserî û pêşnîyarê partîya ma, pawitişê şarê ma bi hewayêko şênber pare kerdê. Sere de azadîya kar û xeberresanişî ya Rêzdar Abdullah Ocalanî derheqê gaman de ke ganî bêrê eştene êdî berpirsîyarî ya îqtîdarî ya. Ma paweyê ke goreyê na berpirsîyarîye hereket bikerê. Seba çareserîya demokratîke ganî îradeyo sîyasî bêro nîşandayene.”
