Têgêrayîşê Cinîyanê Azadan, vera karî ra eştişê hemşîra Îkra Avci eşkerayîye da û wina vat: “Ganî no qeraro bêhuqûq û sîyasî lezabez bêro peyde girewtene û Îkra Avci newe ra agêro karê xo ser.”
Çeteyê HTŞ’yî bi nameyê Ramî El Dehş, şaristanê Reqa de vîdeoyê hovîtîya xo yo ke gilayê şervana YPJ’yî birnabî, vila kerdibi. Medyaya dîjîtale ser o, vera nê têgêrayîşî reaksîyonî huşkî ameyê mojnayîş û pêroyî dinya de kampanyayê mûnitişî gilayan ame dest pêkerdene. Kocaelî de hemşîre Îkra Avci zî tewrê kampanyayê mûnitişî bîbî. Badê vîdeoyê hemşîre yo ke medyaya dîjîtale ser o ame vilakerdene, hetê faşîstan ra ame hedefgirewtene. Wezaretê Weşîye yê Tirkîya zî derheqê hemşîreye de tehqîqat daye dest pêkerdene. Badê tehqîqatê, Wezaretê Weşîye yê Tirkîya Îkra Avciyê karî ra eşt. Karî ra eştişê Îkra Avci, bi reaksîyonan ame protestokerdene.
Derheqê babete de Têgêrayîşê Cinîyanê Azadan (TJA) zî eşkerayîyêke nuştekî da û nerazîbîyayîşê eşkera kerd.
Eşkerayîya TJA’yî wina ya:
“Her girêko ke vera hêrişanê beden, nasname û îradeyê cinîyan ser o ma aver beno, sembolê têkoşînê azadîye û hemkarîya cinîyan a. Rojava de, hem seba destekê cinîyanê xoverdayox ê ke hetê çeteyanê dişmenê cinîyan ra porê înan ameyo birnayene hem zî seba henkarîya înan, hemşîre Îkra Avci, tewrê kampanyayê mûnitişî porî bîbî. Rixmê qerarê mehkema, karê xo ra ame eştene. No qerar qerarê mehkema zî çinî kerd.
Ganî bêro zanayene ke; şima nêeşkenê bi polîtîkayanê zext, nerazîbîyayîş û hemkarîya înan a ke sînoran derbaz kena, bêveng bikerê. Her girêkê ke Îkra Avci pora xo mûnito, xeta azadîya û vera hişmendîya mêrdeperestî ya. Bi cezakerdena xoverdayîş û hemkarîya cinîyan, ne aştîyêke û ne zî komelêko demokratîk eşkeno awan bikero. Prosesêko winasî de ke hêvîya komelî seba Aştî û Komelê Demokratîk zergûn beno, ma dîya kenê ke karî ra eştişê Îkra Avci goreyê rihê prosesî nîyo. Ganî no qeraro bêhuqûq û sîyasî lezabez bêro peyde girewtene û Îkra Avci newe ra agêro karê xo ser.”
Eşkerayîya TJA’yî bı sloganê ‘CINÎ CUYE AZADÎYE’ qedîya.
