Tirkîya dewê Kefne Mijî û Guherzî yê Dihokî bombarduman kerdê. Riyê hêrişan ra herême de şewat vejîya.
Rixmê qerarê adirbestî yê PKK’yî dewleta tirke yê vera Herêma Kurdîstanî ya Federe dewam kenê. Goreyê xebera Rojnews’î; çimeyê ke herême de yê da zanayene ke artêşê tirk wextêk ra ver dewê Kefne Mijî û Guherzî yê Dihokî bombarduman kerdê.
Ame dîyarkerdene ke riyê bombardumanê dewleta tirke ra baxçeyanê welatij û derûdorê dewe de şewat vejîya. Nêame zanayene ke ka hêriş bi teyareyanê şerî ameyo kerdene yan bi top û obusan.
HPG’yî eşkerayîye daye
Goreyê xebera ANF’yî; HPG’yî bi eşkerayîyêk dîyar kerd ke hêrişê dewleta tirke dewam kenê. HPG’yî da zanayene ke dewleta tirke vera qadanê înan 5 reyî bi teqemenî û gazanê kîmyawî, bi seyan reyî bi çekanê giranan, top û obusan hêrişî kerdî û 43 reyî zî bi kepçe û sondajan hewl da ke aver şêra. HPG’yî da zanayene ke hêzanê înan çarçewaya pawitişo rewa de cewab da hêrişanê înan.
