Hemserekê DEM Partîye Tuncer Bakirhan têhetameyişê şarî de ser pêvînayişê Îmraliyî vat ke eke Tirkîya de aştî biserkewa do Sûrîye de aştî biserkewa. Temsîlkarê sazîyê Elewîye zî qirkerdişê Elewîyan ra bal antê
Hemserekanê DEM Partîye Tuncer Bakirhan û Tulay Hatîmogullari verê banê Şaristanê Hatayî yê DEM Partîye de têhetameyişê şarî ra beşdar bîyê. Têhetameyişî ra temsîlkarê rêxistinê komelî û Elewîye zî beşdar bîyê.
Têhetameyiş de sifte Hemserekê Komeleyanê Elewî yê Demokratîke Zeynel Kete qise kerd û va ke nika Sûrîye de Kerbeleya diyine yeno cuyayiş û wina vat: “Verba zîhnîyetê yewperestî de şaran bi nasnameyê xo, xobixo xover danê. Hêzê Mîyanêneteweyî şaran ra qeyûm tayîn kenê, no ser ganî ma xo bipawê. Eke ewro Sûrîye de nasnameyê Elewîye ra hêriş yeno kerdiş, ganî nasnameyê Elewîye bêro pawitiş. Ganî ma yew bibê, eke Sûrîye de ferasetê Selefî qezenc biko, siba do Tirkîya ra zî no feraset bêro. Ganî verba zîhnîyetê Emevîyî de ma xover bidê.”
Endamê MYK’î ya Partîya EMEK’î Halîl Îmrek zî dîyar kerd ke verba hêrişê DAIŞ’î de nika Rojawan de pergalêko komunal awan bî. Sûrîye de rejîmê Esadî rijya la rayberîya Colanî şaran ra hêvî nêbena. Hem Kurd hem zî Elewîyê Erebî ra hêriş kenê. No ser ganî Sûrîye de şaran dîyarker bibê.”
Rayberîya Xoser ma rê rayîr nîşan dana
Serekê Pêroyî yê ESP’î Denîz Aktaş aşkera kerd ke hêzê emperyalîstî bi mêtingerê herême şarê Rojhîlatê Mîyanênî ra zilm kenê û wina domna: “Surîye de wayîrê qetilan Îqtîdarê AKP û MHP’î yo. Ma nê kesan Qirkerdişê Mereş, Çorum, Sêwaz û Gazî ra zaf weş şinasnenê. Şarê Elewî, Xirîstîyan û şarê qedîm verba nê hêrişan bêwayîr nîyê. Rayberîya Xoser a Sûrîyeya Rojhilat û Bakûrî ma rê rayîr nîşan dana.”
Endama MYK’î ya Federasyonê Meclîsî yê Sosyalîstî Oya Nur bal ant ser şerê hegemonîkan û wina va: “Yew hetî ra cîhadgeran Elewîyan qir kenê yew hetî ra zî hêzê emperyalîsî Sûrîye de hegemonya xo awan kenê. Wa AKP weş bizano, rejîmê Esadî rijya, şarê Sûrîye hema zî serpîyan o. Têkoşînê ma, têkoşînê şaranê Tirkîya, Rojhîlatê Mîyanênî yo. Îradeya şorişî ya şaran eşkeno verê şer û pêkewtişan biga.”
Do Kurd û Elewîye welatijê seyyewbînan bibê
Hemserekê DEM Partîye Tuncer Bakirhan zî verê qiseyê xo Alî Îsmaîl Korkmaz, Abdullah Comert, Ahmet Atakan yad kerd û wina dewam kerd: “Ez şexsê Can Atalayî de heme hepsîyê sîyasîye silam kena. Heyetê ma Birêz Ocalan reyde pêvînayiş kerd, nika heyet partîyê sîyasî reyde pêvînayişan keno. Eke Tirkîya de ma aştî awan bikê do Sûrîye de zî aştî awan bibo. Şerî ra trîlyon Dolar pere ame xerckerdiş eke aştî do bibo nê pere şîrê cebê teqawûd, wendekar û kedkaran rê. Kurd û Elewîyan êdî hamî nêwazenê, wazenê azad biciwê. Ma do welatî ke awan bikê û no welat de zî do Kurd û Elewî welatijê seyyewbînanî bibê.”
