Bahar Yalçinkaya ke Swîsre îadeyê Tirkîya kerd, ameyê girewtene û aye û pîçeka aye ya 15 aşma dekerde hepisxane.
Avûkatê Bahar Yalçinkaya bêmabên Dewleta Swîsre hişyar kerde ke şoro Tirkîya riskê girewtene est o, reyna zî teberê sînorî kerd. Bahar Yalçinkaya rojêk dimayê erşawitişê Tirkîya ameye girewtene. Pîçeka aye ya 15 aşma zî verare de pîya ruşnayî hepisxane. Meqamê Swîsre zî vera rexneyanê pawitoxanê heqanê merdimîye de mendî.
Bahar Yalçinkaya ya ke sûka Swîsre Zurîhî de Merkezê Gêrayîşî yê Oberhalden Finkenriedî ra tewlî di domananê xo pîya erşawîyayî Tirkîya û Tirkîya de ameyî destbendkerdene.
Gorê xabera Mehmet Murat Yildirimî ke Bîanet de vejîyaye, dimayê nêzdîyê rojêk destbendkerdene de hetê hakîmîye ra ameye girewtene û pîçeka xo ya 15 aşma reyde erşawîyayî Hepisxaneyê Cinîyan o Girewte yê Bakirkoyî.
Avûkatê Bahar Yalçinkaya yê Swîsrê Murat Oztenî eşkera kerd ke derheqê mivekîla ey de Tirkîya de cipersayîş û mehkemeyî dewam kenê, coka eke erşawîyo Tirkîya riskê girewtene berz o û înan verê ci no derheq de meqamê Swîsre hişyar kerdî. La meqamanê Swîsre goştarîya înan nêkerda.
Verê çimanê domananê xo de ameyê destbendkerdene û ameyê teberê sînorî kerdene
Nê erşawitişî ra dima destbendkerdene û girewtena Yalçinkaya, meqemanê Swîsrê seredayîna îltîceyî be diqqat û berpirsîyarî girewto dest yan nê, û mevzuatê îadeyî gorê usulî ercnayo yan nê, ney bîy rojev.
Yalçinkaya nêzdîyê di serran Merkezê Gêrayişî yê Zurîhî de tewlî di domananê xo pîya ciwîyêne. Domanan ra yewe 5 serrî ya, yewna zî 15 aşme ya. Domanê aye ya qice Swîsre de ameya dinya.
Gorê agahîyanê hevala aye ya ke eynî merkezî de mendêne, memuranê polîsî waxto ke waşt Bahare teberê sînorî bikerê ya oda aye ra bi zor veta. Şahîde vat ke Yalçinkaya verê çimanê domananê xo de ameyê destbendkerdene û di domanî zî verara aye de pîya erşawîyê Tirkîya.
Pawitox Ozten: Hetê însanî ra nêno qebulkerdene
Pawitox Murat Oztenî zî vat ke no usul hetê huquq û insanî ra nêno qebulkerdene û vera meqamanê koçî yê Swîsre muracato nuştekî kerd, labelê goreyê xabere hetanî nika cewabêk nêgirewto.
Gorê agahîyanê Oztenî, derheqê Yalçinkaya ye de Tirkîya de seba ke îddîa beno tewrê hereketa Sîyasîya Kurdan bîya û propaganda kerda persayiş û davayî est bî.
Erşawitiş ra dima destbendkerdiş û girewtena Yalçinkayaye, ercênayişê xeterê şahsî yê Swîsre kerd muneqeşe. Huquqê heqanê mordeman de, merdimo ke erşawîyeno welatêk eke heqanê xo ra mahrum bibo yan zî ihlalê heqan bivîno, ercnayîşê nê durumî bi qerarê teberê sînorî ra temînato temel o.
