Vengdayîşo tarîxî yê Rayberê Şarê Kurdî Abdullah Ocalanî zîndanan de bi coşî ame verwazîkerdene. Tepişteyanê PKK’yijan her çiqas vengê ci nêşiro ci zî na hela tarîxî sey “Roj Kurdîstan de newera vejîya” tarîf kerd.
Vengdayîşê bi vîdeoyî yo tarîxî yê Rayberê Şarê Kurdî Abdullah Ocalanî ke badê 27 serran ame kerdene tesîro zaf gird kerd. Tepişteyanê PKK’yijan her çiqas vengê ci nêşiro ci zî parekerdişê dîmenî bi coşî verwazî kerd û vat no serkewtişo muhîm o.
Tepişteyanê PKK’yijan hîsê xo wina pare kerdî.
Zîndanê Sîncanî ra Îsmet Akin: “Ez 30 serrî yo partî de ya. Mi derheqê cuye, famkerdiş, azadîye û sey kurdêkî derheqê xovînayîşî her çî PKK de dî. 26 serrî yo veng û dîmenê rayberê şarêkî nêame dayene ke no zulm o. No zulm zîndan de hema ma rê beno.
Kanalanê ke ma seyr kenê vengê Rayberîye nêdanê. Gama ke ma fotografê Rayberîye dî, seba ke 26 serrî yo zîndan de yo ma de hîsê hemrayîya kême afirna.”
Tepişteyê PKK’yijê ke Zîndanê Duzce de yê: “Ma pîya bi coşê nê prosesê tarîxî mehcubê ke pêro berpirsîyarîye û baro giran milê Rayberîye de yo. Ma xorexnekerdişê xo danê. Ma do heta peynî paştî bidê înşayê komelê demokratîkî.
Bi na wesîle ma sere de Rayberîye, heme embazan û şarê xo selam kenê; hurmet û minetanê xo şawenê.”
Tepişteyê PKK’yijî yê Zîndanê Sîncanî: “‘Tarîx roja ma de; ma destpêkerdişê tarîxî de nimeteyê’ vateyê Rayberîye yo. Ê ke bi desturîya tarîxî nêbedilîyenê, tarîx goreyê xo înan bedilneno. Ma serkêşîya Rayberîya xo de bedilnayîşo raşt anê ca û heriknayîşê tarîxî rê erjo hêzdar danê qezenckerdene. Şarê Kurdîstanî nê prosesî bi qezencê girdî do verwazî bikerê.
Ma vîdeo seyr nêkerd; veng nêdîya, têna dîmen dîya. Vindertişê Rayberîye û embazan hêz da ma. Şer zo ro, ma bê teredutî ey rê vat temam; la haştîye dahîna zor a. Ma do bê teredutî tewrê haştîye zî bibê.”
Tepişteyê cinîyî yê PKK’yijî yê Zîndanê Sîncanî: “Vengê Rayberîye nêame ma la fotografê ci bi heyecanî ame verwazîkerdene. Tîlîlî û govende ameyî girewtene. Her kesî bi coşî xebere daye yewbînan. Tay embazan zerrîya xo kerde teng û bermayî. Pêrune de no hîs ame afirnayene: Roj Kurdîstan de newera vejîya û roşnayî da ma pêrune.
Ma heta peynî peyê paştîya Rayberîya xo de yê. Têkoşîn çi hewce keno, ma do cehd bikerê ke ey bîyarê ca. Ma qerararîya têkoşînî çimanê Rayberîye û embazanê ci dî; ma zî wina qerardar ê.”
