Cagîrê Serekê Grûba DEM Partî Sezaî Temellî îfade kerd ke pêvînayîşê komîsyonî yê Rayberê Şarê Kurdî Abdullah Ocalanî reyde dîyarkerdoxo tewr krîtîk ê prosesî yo û vat: “Muzakeregerê serekeyî reyde ganî bi lezûbez zemînê muzakereyî bêro viraştene.”
Temellîyî kombîyayîşê çapemenî yê meclîsî de rojev erjna û bale ant 1ê teşrîna verêne de akerdişê meclîsî û muhîmîya dewrê qanûnviraştişî yê neweyî ser o, vat ganî dewreyo newe yê verênan ra cîya bo.
1ê teşrîna verêne 2024î ra nat
Temellî vat: “Tarîxê sîyasî yê Tirkîya de averşîyayîşê muhîmî pîya ciwîyayî. Par 1ê teşrîna verêne de desto ke Devlet Bahçelîyî derg kerd, ma pêrûnan dawetê zemînêk kerd. Ma no dest qîymetin dî, bawerîya ma ameye ke sîyasetê ke heta nika şer û pêkewtişan ra awan bîyo, ganî biqedîyo.”
Prosesê tarîxî
- 27ê sibate: Rayberê Şarê Kurdî Abdullah Ocalanî Vengdayîşê Aştî û Komelê Demokratîkî pare kerd
- Kongreya PKK’yî: Vengdayîşî qebul kerd û xo fesih kerd
- 11ê temmuze: Seba sembolê aştî merasîmê îmhakerdişê çekan
- 5ê tebaxe ra nat: Xebata komîsyonî ke yena kerdene
Qanûnê lazimî
Temellî vat ganî qanûnê entegrasyonê demokratîkî, qanûnê înfazî û paketê edaletî bi lezûbez bêrê meclîs û wina domna: “Girewteyê sîyasî, girewteyê nêweşî hema zî zindanan de yê. Sebebo bingeyîn qanûnê înfazî yo.”
Pêvînayîşê Ocalan reyde
Temellî vat: “Birêz Ocalan aktoro sereke yê muzakere yo. Nê prosesî de çinhesibnayîşê rolê ey, mumkun nîyo. Muxatabîya ey bi lezûbez ganî bêra temînkerdene.”
Temellî peynî de vat ke înan komîsyonî ra waşto ke Îmralîyî reyde kom bibê: “Seba nê prosesî dîyarkero tewr krîtîk Ocalan o. Komîsyonî hema ney nêgirewto rojevê xo. Cesaret bimojnê. Zîhnîyetê emnîyetinî ra xo bixelesnê. Muzakeregerê serekeyî reyde bilezabez zemînê muzakereyî virazê.”
