Heyetê Îmrali yê DEM Partî ra pêvînayîşî ra dima ke Serekê Pêroyî yê Gelecek Partî Ahmet Davutogluyî reyde kerdbî, beyanat da. Endamê heyetî Sirrî Sureyya Onderî ard ziwan ke pêvînayîşî de pêşnîyaz, rexne û hîşyarî waştî.
Parlamenterê Partîya Têdûştî û Demokrasîya Şaran (DEM Partî) Pervîn Buldan û Sirrî Sureyya Onder, badê pêvînayîşê ke Rayberê PKK’yî Abdullah Ocalanî reyde kerdbî, waştişê Abdullah Ocalanî ser o şinê zîyaretê partîyanê sîyasîyan. Parlamenter Pervîn Buldan, Onder û Hemşaredarê Şaristanê Girdî yê Mêrdînî Ahmet Turk ke cayê ey de qeyyum ameyo tayînkerdene, çarçewaya zîyaretan de Serekê Pêroyî yê Gelecek Partî Ahmet Davutogluyî reyde pêvînayîş kerd. Sirrî Sureyya Onderî, pêvînayîşî ra pey wina va: “Ma tayê qalê tecrubeyê xo yê verênan kerdî. Ma çarçewaya pêvînayîşanê neweyan de înan reyde malumatî pare kerdî. Ma înan ra pêşnîyaz, rexne û hîşyarî rica kerdî. Înan zî ma bi hawayêko hîra agahdar kerd. Ma do pêvînayîşê Selahattin Demirtaşî ra dima beyanatêko hîra bidê.
Ahmet Davutoglu: Başkerdene pêdemokrasî bena
Ahmet Davutogluyî zî seba zîyaretî heyetî rê sipasî kerd û va: “Pêvînayîşêko zaf zerrîgerm bi. Ma qenaetê xo pare kerdî. Ganî tecrubeyê verênan ra dersî bêrê girewtiş. Ma va ke demêk de ke heme dinya de, herême de, Sûrîye, Iraq, Lubnan û Urdun de vurîyayîşê lezgînî benê, ma bale ant muhîmîya rewşa zereyî ser o. Başkerdişê rewşa zereyî zî tena pê demokrasî bena. No zî bi perspektîfo ke Kurd, Tirk û heme welatîyî ameyoxî ra bi hêvî ewnîyenê, mumkin o. Pêşnîyazê mi o yo ke hem endamê heyetî hem zî heme sîyasî ganî vera nê prosesî, seba viratişê aştîya Tirkîya hereket bikerê.”
Rojnamegeran, erjnayîşê Hemsereka Pêroyî ya DEM Partî Tulay Hatîmogullarî yê derheqê Xezze de persayî. Sirrî Sureyya Onderî zî va: “O beyanat çewt ameyo fehmkerdene. Nêzdîbîyayîşê ma yo pêroyî bi karesatî nê, bi aştî eşkeno bêro pênasekerdene. Aştî çîyêka rehet nîya la çîyo tewr rind a. Ma rîca kenê ke kes wa nê vatişan çewt fehm nêkero.
