Pezkovîyê ke cisnê înan binê tehlukeyê qedîyayîşî der ê û seba şarê Dêrsimî pîroz ê, hem benê hedefê îhaleyê ke wezaret akeno û hem zî yê seydbazan ke qaçax seydîye kenê.
Dewijê ke dewa Kolonkayaya qezaya Pêrtage de vengê tifingî eşnawit xeber da ekîban. Cigêrayîşo ke dest pêkerd, tede tesbît bi ke yew pezkovî herême de ameya qetilkerdene.
Goreyê xebera Rojnameyê Ozgur Dêrsimî, 4 kesî ke mîyan de Parlamenterê Konya yê ÎYÎ Partî Unal Karaman zî est o, pê qeyikî herême ra remayê. Ekîban, bi ardimê qeyikanê Serekîya Qeyikanê Cendirmeyan qeyiko ke remayo teqîb kerd. Seba ke qeyik şîyo kenara Xarpêtî ra, ekîban Cendirmeya Wîlayetê Xarpêtî û dima Dadgeho Pêroyî yê Xarpêtî rê melumat da û bi talimatê Dadgehî de qeyik de dest bi cigêrayîşî bî. Cigêrayîş de tifingê nêçîrî ya ruhsatine ya Parlamenter Unal Karamanî qeyik de vejîya.
Parlamenterê Konya yê ÎYÎ Partî Unal Karaman û 3 kesanê bînan ke seydê pezkovîyê ke qedexe yo û hetê şarê herême ra pîroz yeno dîyayene, kerdo 650 hezar TL tezmînat û 50 hezar TL zî cezaya îdarî ameye dayene.
Na hedîse ra di rojan verê zî qezaya Mazgîrdî de zî di seydbazî pezkovî qetil kerdbî û 1 mîlyon 327 hezarî ceza ameybî dayene.
