Emserre diyin Musabakaya Estanekaye ya Huseyîn Denîzî hewna yena viraştene, serpirodayişê musabakaye destpê kerd. Sekreterê Şaxê Riha yê Egîtîm Senî Sînan Halat seba beşdarîya musabakaye vendayîş da.
Şaxê Riha yê Egîtîm Senî emserre diyin Musabakaya Estanekaye ya Huseyîn Denîzî virazeno. Musabaka bi zaravayê kurdkî yê kurmancî û zazakî de yena kerdene. Têdeyîya musabaka emserre serbest ame veradayîş û eserê ke musabakaye ra ameyê do kitabêk de bêrê komkerdene. Netîceyê musabakaye do 15ê Gulane Roşanê Ziwanê Kurdkî de bêro îlankerdiş.
Jurîyê musabakaye
Jurîyê zaravaya kurmancî yê; Haşîm Yetîm, Mehmet Yildiz, Abdurrezak Dag ê û jurîyê zaravayê zazakî zî; Sefer Bakçî, Şahîn Kukçu û Kafur Seçîlmek ê.
Sekreterê Şaxê Riha yê Egîtîm Senî Sînan Halat seba beşdarîya musabaka vendayîş da û wina va: “Huseyîn hem mamoteyêk hem zî rojnamegerêk bî. seba ke raştîyan roşn kerdî ame qetilkerdiş. Seba xatiraya ci na musabaka ma virazenê. Par çi eserê ke musabakaye rê ameyî ma bi nameyê “çîrokên pêşbirka Huseyîn Denîz” kitab kerd. Kitab de zaravayê kurdkî yê kurmancî û zazakî de 16 estanek est ê. Têdeyîya musabaka emserre serbest ame veradayîş û eserê ke musabaka ra ameyê do kitabêk de bêrê komkerdene. Netîceyê musabakaye do 15ê Gulane Roşanê Ziwanê Kurdkî de bêro îlankerdiş. Seba ziwanê dayîka xo wa na musabaka ra beşdarî zaf bibo.”
