Weçîniteyanê şaristananê Serhedî seba waştişê azadîya fîzîkî ya Rayberê Şarê Kurdî Abdullah Ocalanî vengdayîşê beşdarîya mîtîngê “Hêvî û Azadîye” kerd ke 4ê çeleyî de Qadê Îstasyonî yê Amedî de do bêro viraştene.
Weçîniteyanê şaristananê Serhedî Meydanê Şaristanê Wanî de amey3e pêser û derheqê mîtîngî de eşkerayî daye. Hemserekê Şaredarîya Îdirî Mehmet Nurî Guneşî metnê eşkerayî bi tirkî û Parlamentera DEM Partî ya Mûşî Sumeyye Boz bi kurmancî wend.
Sumeyye Boz vat ke bi vengdayîşê ke Rayberê Şarê Kurdî Abdullah Ocalanî 27ê sibatî de kerd prosesê ‘Aştî û Komelê Demokratîkî’ resa merheleyêka newîye. Boz îfade kerd ke nê vengdayîşî hêvîya derheqê çareserîya demokratîke ya meseleyê kurdan û awankerdişê aştîyêka birûmete xurt kerd la vera naye hetê îqtîdarî ra gamê şênberî nêameyê eştene.
Boz bale ante prosesê ‘Aştî û Komelê Demokratîkî’ ser o ke seba ke aver şêro şertê seypê de xebitîyayîşê hetan prensîbêko bingeyin o û vat: “Na çarçewe de ganî azadîya fîzîkî ya Birêz Ocalanî bêra dayene û vernîya ey bêra akerdene ke şertanê seypê de prosesî rê hetkarî bikero.”
Sumeyye Boz vat ke paradîgmaya demokratîk, ekolojîk û azadîperwere ya cinîyan a ke Rayberê Şarê Kurdî Abdullah Ocalanî şertanê tecrîdî de ke 26 serrî yo Îmralî de dewam keno, pêşkêş kerd, resayîşê paradîgma ya bi heme qismê komelî seba awankerdişê aştîyêka birûmete muhîm o.
Sumeyye Boz dîyar kerd ke ganî proses heba nêbo û vat ke merheleya dîyine de viraştişê bingeyê huqûqî û caardişê prensîbê “heqê hêvî” mecburî yo. Boz îfade kerd ke Rayberê Şarê Kurdî Abdullah Ocalan muxatabo bingeyin û muzakerekerdoxo sereke yê prosesî yo û şertanê nikayênî de nêeşkeno nê rolî bîyaro ca.
Peynîya eşkerayî de bale ame antene ke îqtîdaro sîyasî û muxalefet ganî hewcedarîyanê nê vengdayîşî bîyarê ca û vengdayîşê beşdarîya mîtîngê “Hêvî û Azadîye” ame kerdene ke do 4ê çeleyî de saete 13:00î de Qadê Îstasyonî yê Amedî de bêro kerdene.
Eşkerayî bi slogananê “Bijî Serok Apo” qedîyaye.
