Serekê Egîtîm Sen’î Şûbeyê 2. yê Amedî Serhat Kiliç hêrişê ke vera wendekar û mamosteyan yenê kerdiş ser o wina vat: “Televîzyon de fîlmê şiddetî yenê temaşekerdiş. Her roje xeberan de yeno vînayene ke dewlete senî şer kena û hêriş kena. Nê fîlm û xeberî gedeyan rê benê nimûneyê hêrişan.
Hêrişê ke vera wendekar û mamosteyan şaristanê Mereş û Sêwregi de qewimîyayê, hema zî yenê protestokerdene. Hêrişanê Mereşî de 8 wendekarî, yew mamoste ameyê kiştene û 20 kesî zî birîndar bîyê. Nê semedî ra Egîtîm Sen’î yew roj nêşi kar û hêrişî protesto kerd. Dima ra Platformê Şubeyan ê Konfedarasyonê Sendîkaya Karkeran ê Pêroyî (KESK) vizêrî kar verada, ewro zî çalakîyê înan devam kenê.
Ne çarçewa de Serekê Egîtîm Sen’î Şubeyê 2. yê Amedî Serhat Kiliç ajansê ma rê qisey kerd.
‘Fîlmê şer û şîdetî wendekaran ser o tesîr kenê’
Serhat Kiliçî hêrişê vera wendekar û mamosteyan ke Mereş û Sêwregi de qewimîyayê ardê vîr û wina vat: “Nê hêrişan da zaf mamoste û wendekarî birîndar bîyê û kişîyayî. Çi heyf o ke wendegehî êdî bîyê warê hêrişan. Mamosteyî her roje rastê hêrişan yenê. Heme hêrişî wisa nêvejîyenê xeberan la her roje nê çîyî benê. Şîdet edî bîyo enstruman o ke her kes eşkeno bişuxulno. Ganî ma sebebanê nê vajê. Wexto ke ma TVyan akenê, ma xeberanê şerî, fîlmanê şerî û fîlmanê çeteyan vînenê. Û ewro no şîdet tesîrê wendekaran keno. Çi heyf o ke her kes rehet keweno wendegehan.”
‘Gedeyî mîyanê şîdetî de pîl benê’
Serhat Kiliçî veng da îdareyan û komel û vat: “Îdare wa asayîşê wendekaran bîyaro ca. Komel bi xo zî eşkeno nê problemî çareser bikero. Nê hêrişanê Sêwregi, ci ra pey Mereş, wina aseno le do dewam zî bikerî. Nê gedeyî mîyanê nê komalî de pîl bîyê, ma nêeşkenê vajê, sucê gedeyan tena yo. Sucdar tena yew kes nîyo, komel zî sucdar o. Gedeyî yenê dinya, a dinya de pirodayiş est o. Ewil pî yan dano maye ro, pî dano gede ro. Şîdet uca ra dest pêkeno. Televîzyon de fîlmê şîdetî yenê temaşekerdiş. Her roje xeberan de yeno vînayene ke dewlete senî şer kena û hêriş kena. Nê fîlm û xeberî gedeyan rê benê nimûneyê şerî. Yanî gedeyî mîyanê şîdetî da pîl benê. Ma gera vernîya nê çîyan bigîrî.”
‘Perwerdeyê Tirkîya mîlîtarîzmî ra yeno dayîş’
Serhat Kiliçî qiseykerdişê xo wina domna: “Perwerdeyê Tirkîya her tim mîlîtarîzmî ra yeno dayîş. Perwerde gere gedeyan mîlîtarîzmî ra bixelesno labelê Tirkîya de tim mîlîtarîzm est o. Mîlîtarîzm xo ra çek o. Wina gede xo keno nêzdîyê çekî. Nika rewş raşta zî xirab a. Edî nê meseleyî nêyenê qebulkerdiş, gereka bala heme komalî na mesela ser o ba.”
