Rûsya û Ukrayna eşkera kerd ke înan bi seyan drone yewbînan vistê. Hêrişî Ukrayna ser o de 4 kesî cuya xo ra bîyî.
Wezaretê Pawitişê Rûsya eşkera kerd ke înan mabenê şewa pancşeme û sire sibayê îne de, 553 teyareyê bêmerdimî ê Ukrayna, Rûsya, Kirim, Behrê Sîya û Behrê Azakê de îmha kerdê yan zî asteng kerdê.
Hêzanê Hewayî yê Ukrayna zî dîyar kerd ke eynî şewe, Rûsya 112 teyareyê bêmerdimî erşawitê, înan ra 90 teyareyî bi sîstemê pawitişê hewayî ameyê bêtesîrkerdiş. Goreyê rayedaranê Ukrayna, wextê hêrişanê cîyayan de, teyareyanê bêmerdiman ver zerar virazîyo.
Herêmê Sumy yê vakurêrojhelatê Ukrayna de hêrişanê teyareyanê bêmerdiman ê Rûsya de cinîyêka 29 serrî û lajê aye yo 9 serre cuya xo ra bîyî. Hêrişanê ê 24 saetanê peyînan de cinîyêka 63 serrî zî cuya xo vîndî kerd û 5 kesî zî birîndar bîyî.
Şaristanê Kramatorsk ê herêmê Donetsk de zî hêrişanê Rûsya ver, tewr tay kesêk merd û 15 kesî zî birîndar bîyî.
Vurîyayîşê Cenazayan
Heto bîn ra Rûsya û Ukrayna seba cenazayanê leşkeranê xo ê ke şer de cuya xo vîndî kerdê, vurîyayîşêko newe caard. Ukrayna eşkera kerd ke 261 cenaza hetê Rusya ra ameyê teslîmkerdene û resayê Ukrayna.
