Mamosteya ziwanê kurdkî Sureya Heme Elî îfade kerd ke semedê vîndîbîyayîşê ziwanê kurdkî mîyanê ciwanan de rolê keyeyî û merkezê wendişî yo, ganî dayîkan wextê qiseykerdişî de çekuyanê xerîban nêşuxulnî.
Ziwan nasname û esasê her milletî yo û yew sebebê hişmendîya miletan o. Seba ci bi seyan serrî dişmenê kurdan cehd kerdo ke ziwanê kurdkî werte ra wedarnê. Derheqê avzelîya ziwanî de mamosteya ziwanê kurdkî Sureya Heme Elî qisey kerd.
Wayîrê rolêkî yê girdî yo
Sureya Heme Elî destpêkerdişê qiseykerdişê xo de bale ant sebebê vîndîbîyayîşê ziwanê kurdkî ser mîyanê ciwananê Kurdistanê Başûrî de û wina dewam kerd: “Sebebê vîndîbîyayîşê ziwanê kurdkî mîyanê ciwanan de, rolê keyeyî û merkezê wendişî yo. Çimkî doman destpêkî de mîyanê keyeyî de goşdarî dano ziwanî. Her wina terbîyekerdîşê domanan hetê dayîkan ra wayîrê rolêko girdî yo, nêwazo tesîrê ziwanê xerîban zêde bo û tevlî çekuyanê kurdkî bibo. Qismêk wendegehê taybetî seba ziwanê kurdkî bîyê problem, çimkî wextê mevzûyan de kurdkî tepa de veradanî. No zî beno sebeb ke ziwanê xerîban hîna zêde serdest bo.”
Wa dayîkî domanê xo reyde kurdkî qise bikerî
Derheqê tedbîranê seba pawitişê ziwanê kurdkî de Sureya Heme Elî wina va: “Ganî hetê eleqedarî û Wezaretê Perwerdeyî bi qerarêk wendişê ziwanê îngîlîzkî heta wendegehê seretayî sinifa 3yine bidero vindernayîş ke domanî baş bieşkerê bi ziwanê kurdkî qisey bikerê. Her wina keyeyî wextê betlanî de domananê xo seba musayîşê ziwanê xerîban meerşawê, teyna naye ra vêşî dayîkî wextê qiseykerdişî de bi domananê xo kurdkî qisey bikerê, çimkî dayîkî bi çekuyanê xerîban domananê xo reyde qisey kenê û no yew zî tesîr keno domanan ser.”
Sebebê vîndîbîyayîşî beno
Sureya Heme Elî wina qedîna: “Çimê îşxalkeran erdê Kurdistanî ser o yo, seba naye kurdkî zî Kurdistan bi çar parçeyan ra bîyo vila. Seba ke kurdkî bi ziwanê xo azad qisey bikerê, gelek şehîdî dayî, la ma nika bi xo nê destkewteyê xo werteyî ra wedarenî. Keyeyanê xo de ziwanê kurdkî domananê xo nêmisnenê. Teyna naye ra vêşî bi rayîya filmê sînemayan û teknolojî domanî kulturê xerîban bander benê. Teberê zirarî de, eynî wextî de na yewe beno sebebê xirabîyayîşê komelî zî.”
