Seba Endamê Heyetê Îmraliyî yê DEM Partî Sirri Sureyya Onderî xeylê şaristanan de tezîye ameye ronayene û bi girseyî ameye zîyaretkerdene.
Endamê Heyetê Îmraliyî yê DEM Partî û Serekwekîlê Meclîsî Sirri Sureyya Onder 3ê gulane de şi heqîya xo. Xeylê şaristanan de seba Onderî tezîye ameye ronayene. Rêxistinanê DEM Partîyî yê şaristan û qezayan tezîyeyî ke ameye ronayene, bi girseyî ameyê zîyaretkerdene.
AMED
Bi seyan kesî şîyê zîyaretê tezîyeya ke awanîya Rêxistina DEM Partîyî ya Amedî de ameya ronayene. Endamê Platformê Kede û Demorkasîyî yê Amedî, parlamenterê verênî, Dayîkê Aştî û temsîlkarê rêxistinanê komelo sîvîl û rêxistinê girseyî yê demokratîkî şîyê tezîye. Hemşaredarê Amedî yê Şaristanê Girdî Dogan Hatun tezîye de qisey kerd û vat: “Wa dayîkê ma xo bêhêvî nêverdê. Bi hezaran embazê ma seba aştî cuya xo vîndî kerde. Na ala ya. Înan na ale heta roja ma arde û no bar nika zî milanê ma ser o yo. Ma do nêverdê na ale bikewa erde. Ala ke Sirri ardbî, ma do bifirnê û aver berê. Ma do barê ey zî bigîrê milanê xo ser o, hîna zaf bixebitî û aştîya mabênê şaran de bîyarê ca.”
Hemşaredara Amedî ya Şaristanê Girdî Serra Bucake zî nê çîyî vatî: “Sey heme vîndîkerdişan, no vîndîkerdiş zî seba ma vîndîkerdişêko bêwext bi. O semedî ra zerrîya ma pêrûnan veşena. Sirri Sureyya Onder hem şarê kurdî rê hem şaranê Tirkîya rê he. Zî komelê ke seba demokrasî û heqanê merdiman xover danê, erjê zaf pîlî verdayê. Heta ke aştî bêra nê welatî, do no têkoşîn her ke şêro hîna pîl bibo. Vîrameyîşê ey do rayîrê ma roşnî bikero.”
RIHA
Awanîya Rêxistina DEM Partî ya Rihayî zî tezîya ameye ronayene. Pankarto ke fotografê Sirri Sureyya Onderî ser o bi zî awanîya partî ra ame aliqnayene. Sateanê serê sibayî ra xeylê kesî ameyê zîyaretê tezîye. Tezîye do heta roja çarşeme dewam bikera.
ŞIRNEX
Tezîyeyî ke Şirnex û qezayanê ci de ameyê ronayene zî bi girseyî ameyê zîyaretkerdene. Dengbêj Fadîle Aytîş ke beşdarê tezîyeya qezaya Silopyayî bîye, fotografê Onderî girewt û lorike vate, xeylê kesî bermayê.
