Alî Hasan Akgul nê 52 rojî yo ke grewê vêşanî de yo, Akgul wazeno ke hepisxaneyo ke rewşa ci hîna bi weşî rê bêro sewqkerdene. Balantişê rewşa Akgulî ser o Dêrsim de beyanat ame dayene û maya Alî Hasan Akgulî, Kader Guler va ke ez seba lajê xo adalet wazena.
Alî Hasan Akgul Hepisxaneyê Ewleyî yê Berze ya Sincanî ya Enqere de hepsî yo. Alî Hasan Akgul nê 52 rojan ê ke grewa vêşanî de yo, Akgul wazeno ke şîro hetî embazê xo yê hepsê neweşî Ufuk Keskînî û hepisxaneyo ke rewşa ci hîna bi weşî rê bêro sewqkerdene. Balantişê rewşa Akgulî ser o Kuçeyê Hunerî yê Dêrsimî de, meş ame kerdene û dima zî beyanat ame dayene. Beyanatî ra keyeyê Alî Hasan Akgulî, Keyeyê Tayadijî, temsîlkarê rêxistinî yê DEM Partî, ÎHD û ESP’î beşdar bîyî.
Meş de beşdaran bêmîyan “Biciwo têkoşînê ma yê grewa vêşanî”, “Hepsîyê şorişger rûmetê ma yê”, “Wa faşizm qahr bibo, biciwo têkoşînê ma” berz kerdî.
Beyanat zî bi nameyê Keyeyê Tayadijî Ahmet Yildizî wend.
Beyanat wina yo:
“Dewletê emperyaliste fek hepisxaneyê tecrîdî ra veradayî. Çi heyfo ke dewletê emperyalistî hepisxaneyê tecrîdî Tirkîya ra danê akerdayişî. Nika verba pergalê hepisxaneyê tecrîdî de Sercan Ahmet Arslan, Serkan Onur Yilmaz, Mulla Zîncîr, Bakîcan Işik, Yurdagul Gumuş, Mîthat Ozturk, Alî Araci, Alî Hasan Akgul ve Ayberk Demîrdogen mîyanê çalakîya grewa vêşanî de yê. Ganî bi lezî qanûn bêro bedilnayene û hepsê nêweş bêrê serbestveradayene û hepisxaneyê tecrîdî zî bêrê qefelnayene.”
Maya Alî Hasan Akgulî, Kader Guler zî wina qise kerd: “Ez seba lajê xo adalet wazena, qey waştişê domanê mi nînî qebulkerdene û ganî bi lezî nê hepisxaneyan bêrê qefelnayene.”
Dima zî beşdaran çalakîya roniştişî kerd.
