Welatijê Zozanê Hesendînî seba ke bale biancê talankerdişê Zozanê Hesendînî ser o do 26ê temmuze de ver bi Koyê Andokî rayra şêrê û eşkerayî bidê. Welatijê herême Mehmet Baran venda şarî ke tewrê çalakî bibê û vat: “Seba Zozananê Hesendînî ma do Koyê Andokî de bibê.”
Xozaya Kurdîstanî bi serran o bi destê şîrketan madenî yenê talankerdene. Bi veşnayîşî daristanî yenê çinkerdene. Ê herêman ra yew zî Zozanê Hesendînî yo. Zozanê Hesendînî qezaya Pasûr a Amedî de yo. Zozanê Hesendînî nêzdîyê 3 hezar metre berz o. Hetê awe û heywanan ra xeylê zengîn o. La Zozanê Hesendînî de Şîrketo Anonîm ê Bazirganîya Tebrî û Kanzakarîyî ya Pasûrî seba cigêrayîşê kanzayan bi hewayêko bêhuqûqî dest bi cigêrayîşê madenî keno. Welatijanê Zozanê Hesendînî zî 8ê temmuze ra yo vera talankerdişê xoza dest bi çalakîya nobedî kerda. Nobede bi şewe û roje dewam kena. Welatijê herême seba bale biancê talankerdişê Zozanê Hesendînî ser o do 26ê temmuze do ver bi Koyê Andokî rayra şêrê û ûca de do eşkerayî bidê. Welatijê herême Mehmet Baranî vengda şar û ekolojîstan ke beşdarê rayraşîyayîşî bibê.
‘Ma do ver bi Andokî rayra şêrê’
Mehmet Baranî dîyar kerd ke ê do 26ê temmuze de vera cigêrayîşê madenî ver bi Koyê Andokî rayra şêrê û wina vat: “Çend aşmî yo şîrketê madenî Zozananê Hesendînî de cigêrayîş kenê. Nêzdîyê aşmêk o vera cigêrayîşê madenî ma dest bi çalakîya nobedî kerda. Ma nêwazenê kanê madenan vera zozananê ma akerê. Ma do 26ê temmuze de şêrê Koyê Andokî. Ma şarê xo ra wazenê ke beşdarê çalakî bibê. Ma do vera talankerdişê Zozananê Hesendînî Koyê Andokî de eşkerayî bidê.”
