Kurd û dostê înan ê ke Ewropa de cîwîyenî, roniştişê Komîteya Wezîran a Konseya Ewropa ra ver seba ‘Heqê Hêvî’ do ver bi Strasbourg rayra şêrê.
Roniştişê Komîteya Wezîran a Konseya Ewropa ra ver ke do mabênê 9-11ê hezîrane de bêro kerdene, Strasbourg de seba ‘Heqê Hêvî’ di rojî çalakîyî yenî viraştene. Seba tewrbîyayîşê çalakîyan vengdayîş ame kerdene.
9ê hezîrane de do vernîya Konseya Ewropa de eşkerayîyêka çapemenî bêra dayene. Sazgehê sîyasî yê kurdan, partîyî, sîyasetmedarê surgunbîyayeyî û parlamenterî do pîya eşkerayîyêka hempare bidê.
10ê hezîrane de zî do bi beşdarîya girseyî ya kurdan û dostanê înan ê Almanya, Fransa, Belçîka, Hollanda û Swîsre mîtîngêk bêro kerdene. Mîtîng de do waştişê azadîya fîzîkî ya Rayberê Şarê Kurdî Abdullah Ocalanî û caardişê qeraranê MHME’yî vejîyê vernî.
Dosyaya ke derheqê tecrîdê 27 serran de ameya amadekerdiş zî do endamanê Komîteya Wezîran û parlamenteran rê bêra pêşkêşkerdene. Sewbîna do xeylê pêvînayîşî bêrê kerdene.
Her wina seba serrgerra nobeta azadîye ya 15. ya ke 25ê hezîrana 2012î ra heta nika Strasbourg de yena kerdene, do çalakîyî bêrê organîzekerdene.
Waştişo ewilin ê şarê kurdî
Derheqê babete de Hemserekê KCDK-E Engîn Severî zî dîyar kerd ke azadîya fîzîkî ya Rayberê Şarê Kurdî Abdullah Ocalanî waştişêko ewilin ê şarê kurdî yo. Engîn Severî veng da kurdanê dîaspora, bi taybetî cinî û ciwanan kerd ke ê her ca de ke est ê, wa uca de tewrê nê çalakîyan bibê.
