Amed – Sazgehê sivîlî ê Amedî seba mîtîngê 28ê hezîrane vengdayîşê tewrbîyayîşî kerd û waştê ke şarî kurdî seba azadîye û averşîyayîşê prosesî biherikîyo cayê mîtîngî.
Têgêrayîşê Cinîyanê Azadan (TJA), Partîya Herêmanê Demokratîkan (DBP) û DEM Partî do seba azadîya fîzîkî ê Rayberê Şarê Kurdî Abdullah Ocalan 27ê hezîrane de Wan û Mêrsîn de, 28ê hezîrane de zî Amed û Stenbolî de bi sloganê “Bi Raybertîya Azad ver bi Azadîya rayîraşinê”, “Mîtîngê Azadîye” organîze kenê. Amed de do 28ê hezîrane de Meydanê Îstasyone yê Qezaya Yenîşehîrî de saete 17:00 de do bêro viraştiş.
Hemsereka Pêroyî ya DBP’yî Çîgdem Kiliçgun Uçar û Veysî Aktaş do sey qiseykerdoxî tewrê Mîtîngê Azadîye ê Amedî bibê. Hunermend Serhedo, Kadîr Çat û Pinar Aydinlar do mîtîng de konser bidê. Xebatê mîtîngî sere de Amed û Botan de û xeylî şaristananê vakurî Kurdîstanî de yenê rayraberdiş.
Endam û temsîlkarê sazgehanê sîvîl ê Amedî zî seba mîtîngo ke 28ê hezîrane de vengdayîşê şarê Amedî û herême kerd û dayê zanayîş ke sere de seba azadîya fîzîkî ê Rayberê Şarê Kurdî Abdullah Ocalan û heme girewteyan, averşîyayîşê prosesê Aştî û Komelê Demokratîk no mîtîng muhîm o û ganî her kes meydan de vengê xo berz bikerê.
